Тўқаев Мирзиёевга самимий миннатдорлик йўллади
Қозоғистон президенти Қосим-Жомарт Тўқаев Ўзбекистон раҳбари Шавкат Мирзиёев номига миннатдорлик хати юборди. Оқўрда маълумотига кўра, Тўқаев ўз мактубида 14–16 ноябрь кунлари амалга оширган давлат ташрифи давомида Қозоғистон делегациясига кўрсатилган самимий меҳмондўстлик учун чуқур ташаккур айтган.
Президент ўша ташрифнинг тарихий аҳамиятга эга эканини қайд этган ва у икки давлат ўртасидаги стратегик шериклик ҳамда дўстона иттифоқдошликни янада мустаҳкамлаганини таъкидлаган.
Тўқаев, шунингдек, Тошкентда бўлиб ўтган Марказий Осиё давлатлари раҳбарларининг VII Маслаҳат учрашуви юқори савияда ташкил этилганини алоҳида эътироф этган. Унинг фикрича, минтақавий ҳамкорликнинг барча йўналишлари бўйича амалга оширилган муҳокамалар, қабул қилинган муҳим қарор ва ҳужжатлар, шунингдек, Озарбайжоннинг тўла ҳуқуқли иштирокчи сифатида қўшилиши форумнинг стратегик аҳамиятини янада оширган.