"Барселона" тарихий "Камп Ноу"га қачон қайтиши маълум бўлди
"Барселона" мухлислари кутиб-куттирган улуғ кунда – жамоа ниҳоят ўзининг бош майдонига қайтишини эълон қилди. 2,5 йил давомида таъмирлаш ва қайта қуриш ишлари сабабли ёпилган «Камп Ноу» эндиликда яна футбол руҳини қабул қилишга тайёр. Каталония гиганти 22 ноябр куни Ла Лиганинг 13-турида «Атлетик»ни айнан шу аренада қабул қилади. Учрашув Tошкент вақти билан 20:15 да бошланади.
Кўплаб мухлислар учун бу хабар ҳақиқий совға бўлди. Чунки «кўк-анорранглилар» 2023 йил майидан бери ўз уйида бирор ўйин ўтказмаган. Реконструкция давомида клуб «Олимпик Льюис Компанис» майдони ва «Эстади Йохан Кройфф»да ўз баҳсларини ўтказиб келган эди. Аммо бу ареналарнинг ҳеч бири «Камп Ноу»нинг ўзига хос шиддати, муҳити ва кучини бера олмаган.
Расмий баёнотга кўра, жамоанинг қайтиши 1B босқичига оид лицензия олингандан кейин маълум қилинди. Ушбу рухсат 45 401 нафар томошабин учун шароит яратиш имконини тақдим этади. Мазкур лицензия стадионнинг бутун ён трибунасини фойдаланишга очади ва бундан аввал берилган 1A босқичи — жанубий дарвоза ортидаги трибуна учун рухсатни тўлдиради.
Каталония клуби бундан ташқари 1C босқичи устида ҳам ишламоқда. Бу босқич стадионнинг шимолий қисмини тўлиқ ишлатиш учун зарур хавфсизлик, қулайлик ва техник талабларни бажаришга қаратилган. Барча босқичлар тугаллангач, «Камп Ноу» яна европадаги энг катта ва энг замонавий ареналардан бирига айланиши кутилмоқда.
Шунингдек, «Барселона» Чемпионлар Лигаси доирасида Франкфуртнинг «Айнтрахт»ига қарши ўйинни ҳам «Spotify Камп Ноу»да ўтказиш имкониятини кўриб чиқмоқда. УЕФА билан ҳамкорликда бир қатор техник талаблар бажарилгани айтилган, аммо ҳали расмий тасдиқ келмаган. Клуб бу масалани яқин вақт ичида ҳал қилишни мақсад қилмоқда.
Бу орқали “Барселона” нафақат ўз уйига, балки ўзининг маънавий марказига қайтади. Мухлислар учун эса бу фақат бир ўйин эмас — балки икки ярим йиллик соғинчи, хотиралари ва қиёссиз футбол руҳининг жонланиши ҳисобланади. Каталония клубининг қайта қайтиши испан футболида ҳақиқий байрам кайфиятини уйғотиши шубҳасиз.