“Ёлғиз қоларкансан”: Вазира Юнусованинг энг оғриқли сирлари
Актриса Вазира Юнусова турмуш ўртоғининг вафотидан кейинги оғир кечинмалари ҳақида биринчи марта очилди. “Аёл қалби” дастурига интервью берган санъаткор 30 йиллик турмуши, меҳри тўла хотиралари ва бугунги ёлғизлиги ҳақида самимий гапирди.
Унинг айтишича, эр-хотин бўлиб бир кунда 5–6 марта қўнғироқлашишган, ишдан олиб кетиш, ҳол сўраш — уларнинг оддий одати бўлган. “Ҳар дақиқада эслайман. Мени энг кўп эркалатган инсон эди”, — дейди актриса кўз ёши билан.
Юнусова ёшликда 6 йил давомида уйда ўтирган, чунки турмуш ўртоғи ишлашга рухсат бермаган. Кейинчалик қайнонаси орқали саҳнага қайтган ва ўзининг меҳнати билан актрисаликда ўз ўрнини топган.
Энг оғир синов — турмуш ўртоғидан айрилиш бўлган. “Ёшлик ўтади, охирида барибир ёлғиз қолар экансиз. Шуни таътилда, кеч мулоҳазаларда янада ҳис қиласиз”, — дейди у.
Юнусова фаррошликдан то таниқли актрисаликкача бўлган йўлини ҳам эслади. Унингча, инсонни эртак эмас, меҳнат катта қилади. “Устимдан кулганлар бугун фарзандларига мени ибрат қилиб кўрсатяпти”, — дейди актриса фахр билан.
Вайнларда иштирок этиш борасидаги танқидларга эса у бефарқ: “Мен актрисаман. Рол бўлса — ўйнайман. Қизларим ҳам қўллаб-қувватлайди”.
Актриса бугунги кунда турмуш ўртоғининг хотирасини асраб, ёлғизликни енгишга ҳаракат қилмоқда.