Исроилнинг Ғазо сиёсати янги босқичга ўта бошлади
Фаластин–Исроил можароси йиллар давомида жаҳон сиёсий манзарасида энг кескин нуқталардан бири бўлиб келмоқда. Айниқса, Ғазо секторидаги вазият ҳар бир янги баёнотдан кейин янада таранглашмоқда. Шу кунларда Исроил мудофаа вазири Исраэл Кац билдирган янги билдирув ҳам халқаро ҳамжамият эътиборини яна ўша нуқтага қаратиб қўйди.
Исроил Ғазонинг назоратдаги қисмида мустақил ҳаракат қилмоқчи
Исраэл Кацнинг таъкидлашича, Исроил ҳукумати Ғазо секторидаги айрим ҳудудларда ҲАМАС жангариларини қуролдан холи қилишни ўз зиммасига олади. Унинг сўзларига кўра, назорат қилинмайдиган бошқа ҳудудларда бу вазифани халқаро кучлар ёки Исроил армияси бажариши мумкин.
Сиёсатчининг Х тармоғидаги ёзуви Исроилнинг ҳозирги стратегияси жиддий ўзгаришлар остонасида эканини кўрсатди.
Кац: «Фаластин давлатига йўл йўқ»
Мудофаа вазири янги баёнотида Исроилнинг Фаластин масаласидаги сиёсий позициясини яна бир бор қатъий шаклда таъкидлади. Унинг айтишича, мамлакат Фаластин давлатининг ташкил этилишига қаршилигича қолади ва бу масалада ўз қарашини ўзгартириш нияти йўқ.
Кацнинг таъкидлашича, Исроилнинг асосий мақсади — Ғазони тўлиқ демилитаризация қилиш, яъни ҳудуддаги туннеллардан тортиб, ҳар қандай қурол захираларигача барчасини тугатиш. Шу билан бирга, ҲАМАС ҳаракатини тўлиқ қуролсизлантиришни давом эттириш мақсад қилиб қўйилган.
Ғазода отешкесим амал қилмоқда, аммо вазият беқарор
Маълумки, 10 октябрдан буён Ғазо ҳудудида ўт очишни тўхтатиш ҳақидаги келишув амал қилиб келмоқда. ҲАМАС ва Исроил ўртасидаги ўзаро келишувга мувофиқ, томонлар мунтазам равишда гаровда бўлганлар жасадларини алмашишни давом эттираяпти.
Шунга қарамай, минтақадаги сиёсий ва гуманитар вазият ҳали ҳам жуда ноаниқ ва хавотирли.
Дунё давлатларининг аксари Фаластинни тан олган
Айни вақтда дунёдаги 150 дан ортиқ мамлакат Фаластин мустақиллигини расман эътироф этган. Бир неча ой олдин эса бу рўйхат яна кенгайди — Франция, Буюк Британия, Канада, Португалия ва Австралия ҳам Фаластин давлатини тан олганини маълум қилган.
Бу жараён халқаро сиёсий майдонда катта аҳамиятга эга бўлиб, Фаластиннинг нуфузини янада мустаҳкамламоқда. Бироқ Исроил ўз позициясидан чекинмаётгани бўлғуси музокараларни янада мураккаб қилиши мумкин.