Испаниянинг мағлубиятсиз ҳайрати: Ла Роха янги тарих ёзди
Испания терма жамоаси яна футбол оламининг эътибор марказига чиқди. Луис де ла Фуэнте бошчилигидаги жамоа 15 ноябрь куни ЖЧ-2026 саралаши доирасида Грузияга қарши ўтказилган учрашувда 4:0 ҳисобида йирик ғалаба қозонди ва шу билан ўзининг рекордий мағлубиятсиз сериясини 30 та ўйинга етказди. Бу натижа Испания футбол тарихи учун яна бир муҳим лавҳа бўлиб тилга кирди.
Жамоа охирги марта 2023 йил 28 март куни Eвро-2024 саралаш босқичида Шотландияга қарши баҳсда 0:2 ҳисобида мағлубиятга учраганди. Орадан ўтган бир йилдан ортиқ вақт мобайнида Испания мусобақаларда ҳам, саралаш баҳсларида ҳам рақибларига таслим бўлмади. Бу статистика Ла Роха терма жамоасининг барқарор ўйини, юқори даражадаги интизоми ва тактик етуклигини яна бир бор намойиш этмоқда.
Қизиқ жиҳати шундаки, Испания олдинги рекорд ҳам ўзининг тилла авлодига тегишли эди. Висенте дел Боске бошчилигидаги машҳур таркиб — ЖЧ-2010 ғолиблари ва Конфедерациялар кубоги-2013 иштирокчилари 29 та расмий беллашувни мағлубиятсиз ўтказиб, дунё футболида юксак ўрин эгаллаганди. Ҳозирги жамоа эса ўша рекордни янгилаб, янги авлоднинг ҳам қандай кучга эгалигини намоён қилди.
Испаниянинг бу каби барқарорлиги тасодиф эмас. Жамоа ҳар бир ўйинда тўпни назорат қилишда маҳорат, тезкорлик ва жарима майдони яқинидаги аниқ қарорлар билан ажралиб туради. Луис де ла Фуэнте эса ёшларнинг энергияси ва тажрибали футболчиларнинг барқарорлигини ўртача мувозанатда ушлаб, жамоани бир бутун механизм сифатида майдонга чиқараётгани билан эътиборга лойиқ.
Грузияга қарши учрашув ҳам ана шу ҳиссиётларнинг амалий кўриниши бўлди. Испания ҳужумда фаолликни йўқотмади, ҳимояда ҳам жуда ишончли ҳаракат қилди ва ўйин давомида рақибни деярли имкониятсиз қолдирди.
Шу тариқа, Ла Роха яна бир бор тарихда из қолдирди. Энди савол битта: мағлубиятсиз серия қай даражагача давом этади ва испанлар ЖЧ-2026 олдидан яна қандай натижалар билан мухлисларни ҳайратга солади? Мухлислар эса бу жараённи ҳавас билан кузатмоқда.