Литва 17 жыл іздеуде болған күдіктіні Қазақстанға экстрадициялады
Кісі өлтіру және атыс қаруын заңсыз сақтау деректері бойынша 17 жыл іздеуде болған Қазақстан азаматы Литва Республикасынан экстрадицияланды, - деп хабарлайды Tengrinews.kz тілшісі.
Прокуратура мәліметінше, 2007 жылы күдікті сыбайласымен бірге заңсыз жолмен баю мақсатында Алматыға келген. Олардың қылмыстық әрекеті өзге қылмыстық топ өкілдерімен жанжалға әкеп соғып, осылайша олардың бірін өлтіруге шешім қабылдаған.
2008 жылы 19 мамырда күдіктілер жәбірленушіні өз үйінің ауласында күтіп алып, оған бірнеше рет оқ атқан. Соңғы оқ басынан тиген. Осы жарақаттардан жәбірленуші оқиға орнында қаза тапқан.
Қылмыс жасағаннан кейін күдіктілердің бірі ұсталып, сотталған. Ал екіншісі жасырынып, оған халықаралық іздеу жарияланған.
"Жазадан жалтару мақсатында күдікті деректерін өзгертіп, Еуропа аумағында жасырынған. 2025 жылғы тамызда Литва Республикасының шекарасын кесіп өту кезінде ұсталды. Кейін Бас прокуратураның сұрауы бойынша Қазақстанға экстрадицияланды", - деді прокуратура өкілі.
Қазір күдікті тергеу изоляторына қамауға алынды.
Сілтемесіз жаңалық оқисыз ба? Онда Telegram желісінде парақшамызға тіркеліңіз!