Қуёш энергияси учун Қашқадарё аҳолисига 11 миллиард сўм берилди
Қашқадарё вилоятида қуёш энергиясидан фойдаланиш кўлами кенгаймоқда, деб хабар берди расмий манбалар.
Маълумотларга кўра, жорий йилнинг январь–сентябрь ойлари давомида вилоятдаги аҳоли ва тадбиркорларга қуёш панеллари орқали ишлаб чиқарилган энергия учун 11 миллиард 800 миллион сўмдан ортиқ субсидия ажратилган. Бу маблағ қайта тикланувчи манбалардан фойдаланишни рағбатлантириш мақсадида тўлаб берилган.
Ушбу кўрсаткич республика бўйича амалга оширилаётган йирик дастурнинг бир қисми ҳисобланади. Умуман, мамлакат миқёсида 35 мингдан зиёд фуқаро 153 миллиард сўмдан ортиқ субсидия олган. Энг катта улуш Хоразм (42,6 млрд сўм), Қорақалпоғистон (22,4 млрд) ва Бухоро (15,3 млрд) вилоятларига тўғри келади.
Эслатиб ўтамиз, 2023 йил 1 апрелдан бошлаб уйига қуёш панели ўрнатган фуқаролар ҳар бир тармоққа узатилган киловатт-соат энергия учун 1000 сўм субсидия олиш ҳуқуқига эга.
Мутахассислар фикрича, бу дастур нафақат уй хўжаликларининг электр харажатларини камайтирмоқда, балки мамлакатда қайта тикланувчи энергия манбаларини ривожлантириш ва барқарор энергия таъминотини таъминлашга хизмат қилмоқда.