Андижонда 4 нафар қиз танишини калтаклади
Андижон шаҳрида вояга етмаган қизлар ўртасида жанжал содир бўлди, деб хабар берди вилоят ИИБ матбуот хизмати.
Ижтимоий тармоқларда тарқалган видеолавҳаларда бир гуруҳ қизлар бошқа бир қизни уриб, унга тан жароҳати етказаётгани акс этган. Маълумотларга кўра, ҳодиса 7 ноябрь куни Мустақиллик маҳалласи ҳудудида содир бўлган.
Дастлабки маълумотларга кўра, шахсий келишмовчилик сабаб бўлган можарода 4 нафар вояга етмаган қиз иштирок этган. Улардан бири — Ю.Д. ва унинг дугоналари биргаликда Э.М.га тан жароҳати етказгани айтилмоқда.
Ҳозирда ҳолат юзасидан терговга қадар текширув бошланган, барча ҳолатлар ўрганилмоқда.
ИИБ маълумотича, қизларнинг ота-оналарига нисбатан Маъмурий жавобгарлик тўғрисидаги кодекснинг 47-моддасига асосан баённома расмийлаштирилган. Улар 412 минг сўмдан 2 миллион сўмгача жаримага тортилиши мумкин.