Tesla акциядорлари Маскка рекорд бонусни тасдиқлашди
Tesla автомобил ишлаб чиқарувчиси акциядорлари бош директор Илон Маск учун корпоратив тарихдаги энг йирик мукофот пакетини тасдиқлашди. Ушбу мукофотнинг тахминий қиймати 1 триллион долларга етиши мумкин.
Йиллик умумий йиғилишда 75 фоиздан ортиқ овоз билан маъқулланган қарор, мукофотлашни компания олдига қўйилган узоқ муддатли мақсадларнинг эришилишига боғлиқ қилиб белгилайди. Ушбу ўн йиллик мукофот режаси доирасида Илон Маск кафолатланган иш ҳақи ёки нақд пул бонусларини олмайди.
Унинг мукофоти фақат Tesla компаниясининг бозор қиймати ва операцион кўрсаткичларининг ўсишига боғлиқ бўлади. Тўлиқ мукофотни қўлга киритиш учун Маск компания капиталлашувини 8,5 триллион долларга етказиши керак.
Шунингдек, асосий вазифалардан бири автоном таксилар, яъни роботаксилар ишлаб чиқариш бизнесини сезиларли даражада кенгайтиришдир. Агар белгиланган мақсадларга эришилмаса, Маск ҳеч қандай мукофот олмайди.
Режани тўлиқ амалга ошириш Маскнинг компаниядаги улушини ҳозирги 13 фоиздан тахминан 25 фоизгача оширади. Илон Маск аввалроқ бир неча бор компаниянинг стратегик ривожланишига ишончли назоратни сақлаш учун акциялар улушини ошириш истагини билдирган эди.
Tesla директорлар кенгаши Маскнинг компаниянинг узоқ муддатли лойиҳаларига тўлиқ эътибор ва мотивация қаратишини таъминлаш мақсадида бундай йирик мукофотни зарур деб ҳисоблаган. Бироқ, ташаббус танқидларга ҳам учради.
Қарорга қаршилар, жумладан баъзи йирик институционал фондлар, Маск аллақачон компаниянинг йирик акциядори эканлигини ва етарли мотивацияга эга эканлигини таъкидлаган. Уларнинг хавотирлари акциядорлик капиталининг суюлтирилиши ва корпоратив бошқарув хавф-хатарларига қаратилган.
Мазкур овоз бериш Tesla компаниясини электромобил ишлаб чиқарувчи компаниядан робототехника ва сунъий интеллект соҳасидаги технологик гигантга айлантириш бўйича Маскнинг қарашларига инвесторлар томонидан катта ишонч билдирилганини кўрсатади. Илон Маскнинг 2018 йилда тасдиқланган ва қиймати тахминан 56 миллиард доллар бўлган аввалги компенсация пакети ҳам тарихдаги энг катта пакетлардан бири сифатида тан олинган ва ўша пайтда суд жараёнларига сабаб бўлган эди.