Таиланддаги “Miss Universe” маросими можарога айланди
Дунё миқёсидаги энг нуфузли гўзаллик танловларидан бири — “Miss Universe 2025” айни дамда Таиланд пойтахти Бангкок шаҳрида бўлиб ўтмоқда. Бироқ танловнинг биринчи кунлариданоқ у нафақат гўзаллар паради, балки катта шов-шув билан ҳам ёдда қолди, деб хабар берди “International Business Times”.
Маълум бўлишича, 5 ноябрь куни ўтказилган тантанали кутиб олиш маросими пайтида воқеа кутилмаган йўналишда ривожланди. Танловнинг вице-президенти Нават Ицарагрисил хомийлик фотосессиясида иштирок этмаган “Miss Mexico” — Мелиссе Флорес Бошни омма олдида танқид қилиб, уни “аҳмоқ” деб атаган. Бу сўздан кейин залдаги муҳит кескин ўзгарган, кўплаб иштирокчилар эса норозилик белгиси сифатида тадбирни тарк этган.
Кузатувчиларнинг гувоҳлик беришича, воқеа жонли эфир вақтида содир бўлган. Ҳатто хавфсизлик ходимларига Мексика вакилини чиқариб юбориш буйруғи ҳам берилган. Бош эса бунга жавобан саҳнадан чиқиб кетган ва ўз муносабатини очиқ баёнот билан билдирган:
“Мен XXI асрда яшаяпман, ва ҳеч ким менга қўғирчоқдек муносабатда бўлишга ҳақли эмас. Бу танлов фақат гўзаллик ҳақида эмас — бу аёлларнинг овозини эшиттириш ҳақида”, — деган у.
Шу пайтда 2024 йилги “Miss Universe” ғолиби Виктория Кьер Тейлвиг ҳам Мелиссега ҳамдардлик билдириб, тадбирни тарк этганини эълон қилган. Бу ҳолат ижтимоий тармоқларда кенг муҳокамага сабаб бўлди.
Эслатиб ўтамиз, жорий йилдаги “Miss Universe” танлови 74-марта ўтказилмоқда ва унда 79 мамлакат гўзаллари иштирок этмоқда. Чехиялик модель Натали Пушкинова 2025 йилги “Дунё гўзали” танловида мутлоқ ғолиб деб топилган. Колумбия ва Куба вакиллари эса махсус совринларга сазовор бўлган.