Қозоғистон Авраам келишувларига қўшилишга тайёрланмоқда
Қозоғистон Президенти Қосим-Жомарт Тоқаев пайшанба куни АҚШ Президенти Дональд Трамп билан Вашингтондаги учрашувда мамлакатининг Авраам келишувларига қўшилиш ниятини эълон қилади. Бу ҳақда АҚШ маъмуриятидаги манбаларига таяниб, Axios хабар бермоқда.
Нашрнинг хабарича, Тоқаевнинг баёноти Марказий Осиё мамлакатлари етакчилари билан Трампнинг саммити давомида янграйди. Бундан ташқари, Қозоғистон АҚШ билан стратегик муҳим минерал ресурслар соҳасида ҳамкорликка оид келишувни имзолади.
Таҳлилчиларнинг фикрича, бу қадам Вашингтон билан стратегик ҳамкорликни мустаҳкамлаш йўлидаги яна бир қадам бўлади. Шунингдек, Тоқаев ва Трамп Исроил Бош вазири Бинямин Нетаняху билан бирга телефон орқали мулоқот қилиб, Қозоғистоннинг келишувларга қўшилишини расман тасдиқлашлари кутилмоқда.
АҚШ расмийлари ушбу қадамни "Ғазо можаросидан кейин Исроилнинг мусулмон дунёсидаги мавқеини тиклаш бўйича биринчи қадам" деб аташмоқда. "Бу Авраам келишувлари тинчлик ва минтақавий ҳамкорликка интилаётган мамлакатлар учун жозибадор формат бўлиб қолаётганини кўрсатади", деди АҚШ маъмурияти вакилларидан бири.
Авраам келишувлари 2020 йилда АҚШ иштирокида имзоланган. Дастлаб Бирлашган Араб Амирликлари, Баҳрайн, Судан ва Марокаш ушбу келишувларга қўшилиб, Исроил билан дипломатик алоқаларни ўрнатган эди.
Ушбу ташаббус Трамп маъмуриятининг ташқи сиёсатдаги муҳим ютуқларидан бири бўлиб, Исроил ва Яқин Шарқ мамлакатлари ўртасида иқтисодий ва технологик ҳамкорликни ривожлантиришга қаратилган эди. Вашингтон Қозоғистоннинг қўшилиши келишувларнинг янада кенгайишига туртки беришини умид қилмоқда.
Хусусан, Саудия Арабистони валиаҳд шаҳзодаси Муҳаммад бин Салмоннинг 18 ноябрь куни АҚШга ташрифи кутилмоқда. АҚШ расмийлари ушбу ташрифни Эр-Риёднинг келишувларга қўшилишини тарғиб қилиш учун ишлатмоқчи. Аммо музокаралар мураккаб бўлиб қолмоқда.