Костич "Кремонезе" дарвозасига урган голи ҳақида
“Ювентус”нинг чап қанот ярим ҳимоячиси Филип Костич “Кремонезе” дарвозасига урган голи (2:1) бўйича фикр билдирди. У жамоанинг ғалабасидан мамнун эканини айтди.
"Ҳиссиётлар жуда ажойиб, гол урганимдан хурсандман, лекин яна ҳам қувонарлиси, биз ғалаба қозондик. Бу жуда оғир давр эди.
Охирги икки ўйинда асосий таркибда майдонга тушганимдан ва бугун менинг туғилган куним, шунингдек, “Ювентус”нинг ҳам туғилган куни эканидан бахтиёрман. Бу ажойиб бир кун", – деди сербиялик футболчи Sky Sport Italia нашрига.
Эслатиб ўтамиз, Костич Италия А Сериясида охирги марта 2023 йилнинг март ойида гол урган эди. Унинг фаолиятидаги сўнгги голи эса 2025 йилнинг феврал ойида, “Фенербахче”да ижарада ўйнаб юрган вақтда қайд этилган.