Марказий Осиёда аҳоли пулни нималарга кўп сарфлайди?

“Numbeo” платформаси маълумотларига кўра, Марказий Осиё давлатларида аҳолининг асосий харажатлари озиқ-овқат ва уй-жой тўловларига тўғри келади. Қолган сарфлар — кийим-кечак, транспорт, спорт ва дам олиш учун анча кам. Бу ҳолат минтақадаги кўплаб оилалар, биринчи навбатда, асосий эҳтиёжларни қондиришга интилаётганини кўрсатади.

Тожикистон бу йўналишда етакчи бўлиб, аҳоли даромадининг 37 фоизини озиқ-овқатга сарфлайди. Уй-жой ижараси 20 фоиз, ресторанлар 15 фоиз, транспорт 11 фоизни ташкил этади. Кийим-кечак ва дам олишга сарфланган маблағ энг кам — 6 ва 5 фоиз атрофида.

Қирғизистон ва Қозоғистонда ҳам манзара шунга ўхшаш: озиқ-овқат ва уй-жой харажатлари оилавий бюджетнинг қарийб ярмини ташкил этади. Қирғизистонда озиқ-овқат улуши 28 фоиз, ижара 25 фоиз, Қозоғистонда эса мос равишда 30 ва 23 фоиз.

Туркманистон ва Ўзбекистонда ҳам вазият ўхшаш. Туркманистонда озиқ-овқат харажатлари 35 фоиз, уй-жой тўловлари салкам 30 фоизни ташкил қилади. Ўзбекистонда эса спорт ва ҳордиққа ажратиладиган маблағ — 7 фоиз — минтақадаги энг юқори кўрсаткич ҳисобланади.

Бошқа МДҲ давлатларида ҳам аҳоли харажатларининг тузилиши деярли бир хил. Россияда озиқ-овқат учун 29 фоиз, Беларусда 29,3 фоиз, Арманистон ва Озарбайжонда эса озиқ-овқат, ижара ва ресторанлар харажатлари биргаликда умумий бюджетнинг 60 фоизидан ортиғини ташкил этади.

Мутахассислар фикрича, бу рақамлар Марказий Осиё аҳолиси даромадининг катта қисми асосий эҳтиёжларга кетишини ва сарфларнинг ҳали ҳам ҳаётий заруратлар доирасида эканини кўрсатади.