Ўзбек футболчилари маоши ошкор қилинди

Ўзбекистон олий лигасидаги профессионал футболчиларнинг маош даражаси ҳақида маълумотлар эълон қилинди. Бу ҳақда Қозоғистоннинг йирик спорт портали 'Sports.kz' Telegram'даги 'Green Time' каналига таяниб хабар берди.

Маълумотларга кўра, маҳаллий чемпионатдаги футболчиларнинг даромади рақобатбардош ҳисобланади. Ўзбекистондаги етакчи клубларда ўйинчиларнинг ойлик маоши 30-40 минг АҚШ долларигача етиши мумкин.

Бундай юқори даражадаги маош кўплаб истеъдодли футболчиларга хориждаги камроқ молиявий таклифларга ўтишни кўриб чиқмасликка имкон беради. Масалан, Ўзбекистон ташқарисидаги ўртача даражадаги клубларда футболчиларнинг маоши атиги 15-20 минг долларни ташкил этиши мумкин, бу эса маҳаллий клублар таклиф қилаётган суммалардан камроқдир.

'Ўзбекистондаги маошлар етарлича яхши: топ клубларда футболчилар ойига 30-40 минг доллар ишлаб топиши мумкин. Агар ўз юртингда кўпроқ даромад қилсанг, 15-20 минг доллар учун бирор жойга кетишнинг нима кераги бор?

Бундан ташқари, ҳозир кўплаб ўзбекистонлик футболчилар араб давлатлари ва Эрон чемпионатида ўйнамоқда. У ерда маошлар бундан ҳам юқори', — дейилади манбада.