Ўзбекистонлик талабалар Huawei дастурида иштирок этди
Ўзбекистоннинг олтита олий таълим муассасасидан 10 нафар талаба Huawei компаниясининг "Келажак учун уруғлар 2025" дастури доирасида Хитойда ўқув саёҳатида иштирок этди. Ўқув дастури 19–26 октябрь кунлари Донггуан ва Шенжен шаҳарларида бўлиб ўтди.
Талабалар сунъий интеллект, булутли технологиялар ҳамда бешинчи ва олтинчи авлод тармоқлари бўйича интенсив курсларни тинглашди. Дастур доирасида биринчи босқич Huawei компаниясининг Донггуандаги кампусида ўтказилди.
Бу ерда компания экспертлари сунъий интеллектни амалий қўллаш ва булутли ечимларни жорий этиш бўйича маҳорат дарслари ўтказишди. Талабалар Huawei инновацион марказини ва интеллектуал технологияларни бошқариш тизими билан танишишди.
Шенжендаги иккинчи босқичда эса иштирокчилар қайта тикланадиган энергия, электромобиллар ва Huawei Device рақамли ечимлари технологиялари ҳақида маълумот олишди. Бундан ташқари, талабалар DJI ва Tencent компанияларини зиёрат қилишди.
Дастур якунида эса 19 мамлакатдан келган талабалар иштирокида Global Village халқаро маданият фестивали бўлиб ўтди. Талабалар дастурнинг юқори даражада ташкил этилганини ва Huawei мутахассислари билан мулоқот қилиш илҳомбахш бўлганини таъкидлашди.
Турин политехника университети талабаси Фахрия Досмухамедова сафар давомида компаниянинг кўлами ва келажак технологияларини ривожлантиришда илмий тадқиқотларнинг аҳамиятини ҳис қилганини айтди. "Келажак учун уруғлар" дастури Ўзбекистонда 2014 йилдан буён ўтказиб келинмоқда.
Шу вақт мобайнида унда 177 нафар талаба қатнашган. 2025 йилда ушбу таълим ташаббуси 93 мамлакатдан 703 нафар талабани бирлаштирди.
Huawei Ўзбекистонда АКТ соҳасидаги таълимни ривожлантиришни давом эттирмоқда. Ҳозирда ICT Competition 2025–2026 мусобақасига рўйхатдан ўтиш жараёни давом этмоқда, бу ерда талабалар булутли ҳисоблаш ва сунъий интеллект бўйича билимларини намойиш этишлари мумкин.
Компания шунингдек, Тошкент ахборот технологиялари университети (ТАТУ) ҳузуридаги тренинг маркази орқали мутахассислар тайёрлаш дастурларини ривожлантиришни давом эттирмоқда.