Самарқандда Амир Темур мақбараси ва Улуғбек мадрасаси таъмирланди
Самарқандда Амир Темур мақбараси, Улуғбек мадрасаси ҳамда Регистон майдонидаги Тиллакори мадрасаси кенг қамровли таъмирлаш ва экспозицияларни янгилаш ишларидан сўнг яна зиёратчилар учун очилди. Бу ҳақда Ўзбекистон Президенти Администрацияси раҳбари Саида Мирзиёева маълум қилди.
Энди бу ерда юзлаб ноёб экспонатларни, жумладан, Мирзо Улуғбек қўлёзмалари ва Амир Темур тарихи билан боғлиқ архив ҳужжатларини кўриш мумкин. Кўргазмалар замонавий мултимедиа форматида намойиш этилмоқда.
"Айниқса, ЮНЕСКО Бош конференциясининг 43-сессияси меҳмонлари яқин кунларда қадимий пойтахтимизнинг бебаҳо хазиналарини муносиб баҳолаш имкониятига эга бўлишлари қувонарли," — дейди Мирзиёева.