"Реал" президенти Винисиус ва Алонсони яраштирди
"Реал" Мадрид президенти Флорентино Перес клуб базасига ташриф буюриб, бош мураббий Хаби Алонсо ва ҳужумчи Винисиус Жуниор билан учрашди. Маълум қилинишича, Винисиуснинг "Эл-Класико" ўйинида алмаштирилишига нисбатан норозилиги сабаб уларнинг ўртасида келишмовчилик юзага келган эди.
Defensa Central хабарига кўра, Перес Винисиус ва Алонсони яраштириш учун ҳаракат қилган. «Бизнинг ташқарида етарлича душманларимиз бор, улар "Реал"га зиён етказишни истайди. Фақат ички бирлик орқали биз катта натижаларга эриша оламиз», — деди Перес.
Учрашувдан сўнг, Винисиус клуб президенти билан суҳбатдан кейин расмий баёнот чиқариб, кечирим сўради.
"Реал"нинг навбатдаги учрашуви 1 ноябр куни "Валенсия"га қарши ўз майдонида бўлиб ўтади.