Словакия президенти Самарқандга ташриф буюрди

Словакия Республикаси Президенти Петер Пеллегринининг самолёти 29 октябр куни кечқурун Самарқанд халқаро аэропортига қўнди. Ушбу ишчи ташриф Ўзбекистон Президенти Шавкат Мирзиёевнинг таклифига биноан амалга оширилмоқда.

Словакия раҳбарини самолёт трапида Ўзбекистон Бош вазири Абдулла Арипов бошчилигидаги расмий делегация кутиб олди. Ташрифнинг асосий воқеаси икки давлат раҳбарлари ўртасида олий даражадаги музокаралар бўлади.

Учрашувда Тошкент ва Братислава ўртасидаги кўп қиррали ҳамкорликнинг ҳозирги ҳолати батафсил муҳокама қилинади ва уни янада чуқурлаштириш истиқболлари белгилаб олинади. Томонлар ўзаро савдо ҳажмини ошириш ва қўшма инвестиция лойиҳаларини амалга ошириш йўлларини кўриб чиқиш ниятида.

Шунингдек, Петер Пеллегринининг Ўзбекистонга ташриф дастурида ЮНЕСКОнинг 43-Бош конференциясида фахрий меҳмон сифатида иштирок этиши ҳам режалаштирилган. Ушбу йирик халқаро анжуман 40 йил ичида биринчи марта ташкилотнинг Париждаги бош қароргоҳидан ташқарида ўтказилмоқда ва бугун, 30 октябр куни Самарқандда бошланади.

Форумнинг Ўзбекистонда ўтказилиши мамлакатнинг халқаро майдондаги ўсиб бораётган нуфузини кўрсатмоқда. Конференцияда 200 дан ортиқ давлатлардан юқори даражадаги делегациялар иштироки кутилмоқда.

Бу ташриф икки давлат ўртасидаги фаол сиёсий мулоқотнинг мантиқий давомидир. Аввалроқ, 2025 йил июн ойида Ўзбекистон ва Словакия стратегик ҳамкорлик муносабатларини ўрнатиш тўғрисида Қўшма декларация имзолаган эди. Бу икки томонлама алоқаларда янги сифат босқичини бошлаб берди.