NVIDIA тарихда биринчи бўлиб 5 триллион доллар қийматга етди
Америкалик чип ишлаб чиқарувчи NVIDIA компанияси глобал молия тарихида янги саҳифа очди. У дунёда биринчи жамоат корпорацияси бўлиб, бозор қиймати 5 триллион долларни ошди.
Ушбу тарихий натижага NASDAQ биржасида акция нархлари ўсиши сабаб бўлди. 29 октябр, чоршанба куни, NVIDIA акциялари ҳар бир дона учун 207,68 долларга етиб, максимал даражага чиқди.
Бу компания бозор қийматини 5,05 триллион долларга олиб чиқди. Жорий йил бошидан бери компания қиймати 50 фоиздан ошиқ ўсди.
Бу ютуқ сунъий интеллект тизимлари, жумладан, OpenAI компаниясининг ChatGPT лойиҳаси учун зарур бўлган процессорларга талабнинг кескин ошиши билан боғлиқ. Бош директор Йенсен Хуанг яқинда компания сунъий интеллект чиплари учун 500 миллиард долларлик буюртмалар олганини эълон қилди.
Бундан ташқари, у АҚШ ҳукумати эҳтиёжлари учун етти замонавий суперкомпьютер яратиш режаларини маълум қилди. Бу компаниянинг давлат учун стратегик аҳамиятини яна бир бор тасдиқлайди.
NVIDIA номи лотинча "invidia" сўзидан келиб чиққан бўлиб, "ҳасад" маъносини англатади. Асосчилар бу номни технологиялар яратиш орқали рақобатчиларда ҳавас уйғотиш ниятларини акс эттириш учун танлаган.
Шунингдек, АҚШ президенти Доналд Трампнинг сўнгги баёнотлари NVIDIA акцияларига қўшимча ижобий таъсир кўрсатди. У Хитой раҳбари Си Цзинпин билан NVIDIA томонидан ишлаб чиқилган Blackwell сунъий интеллект процессорларини муҳокама қилиш ниятида эканлигини маълум қилди.
Трамп, шунингдек, Йенсен Хуанг билан шахсий учрашув режалаштираётганини тасдиқлади. Бу воқеалар сунъий интеллект технологиялари нафақат технологик соҳада, балки халқаро сиёсатда ҳам муҳим аҳамиятга эга эканини кўрсатмоқда.