Луврни талашнинг янги иштирокчилари қўлга олинди
Франция полицияси Луврдаги Аполлон галереясидан 102 млн долларлик хазинани ўғирлашда гумонланган яна беш кишини ҳибсга олди, деб хабар бермоқда Reuters.
Париж прокурори Лор Беккуонинг бугун RTL радиостанциясига маълум қилишича, сўнгги гумонланувчилар чоршанба куни кечқурун Париж ва унинг шимолий чеккаларида ўтказилган бир қатор рейдлар чоғида ҳибсга олинган. Улардан бири жиноят жойида қолдирилган ДНК излари орқали аниқланган, бироқ гумонланувчиларнинг барчаси жиноятга алоқадор ёки йўқлиги номаълум. Гумонланувчилардан топилган телефонлар ва бошқа буюмлар терговчиларга уларнинг шифрланган хабарларини ўрганиш имконини берганидан сўнг тергов ишлари авж олди.
Шунингдек, Беккуонинг қўшимча қилишича, маданий бойликларнинг ноқонуний айланмасига қарши курашишга ихтисослашган полиция бўлинмаси ўғирланган артефактларни қидириш учун қора бозорни ўрганмоқда. Унинг сўзларига кўра, қимматбаҳо буюмлар пул ювиш учун ёки уюшган жиноятчилик доираларида майда пул сифатида ишлатилиши мумкин.
19 октябрь куни капюшон кийган тўрт нафар босқинчи эрталаб музей иш вақтида ўлжа билан қочиб кетиб, ташриф буюриладиган музейнинг хавфсизлик тизимидаги бўшлиқларни намойиш этди. Бу қўпол ўғирлик бутун дунёни ларзага солди.