Головин Роналдунинг лигасида ўйнашдан бош тортди
Россиялик ярим ҳимоячи, "Монако" футболчиси Александр Головин Саудия Арабистони клубига ўтишдан бош тортди. Бу ҳақда футболчининг вакили Александр Клюев маълум қилди.
"Саудия Арабистони клубидан бизга мурожаат қилишди: улар бизнинг у ерда ўйнашга қизиқишимиз бор-йўқлигини сўрашди. Биз ҳозирча рад жавобини бердик.
Қайси клуб? Кичик эмас. Етакчи жамоа", – деди Клюев "РБ Спорт" порталига берган интервьюсида. Вакилнинг сўзларига кўра, Головин узоқ йўл босиб, Чемпионлар Лигасида ўйнашга эришган.
Шунингдек, россиялик футболчи "Монако" билан соврин қўлга киритишни исташи қайд этилди. Головин 2018 йилда Москванинг ЦСКА клубидан "Монако"га ўтган эди.
Шу вақтдан буён у бирорта ҳам соврин ютмаган бўлса-да, бир марта кумуш ва уч марта бронза медалларини қўлга киритган. Головиннинг "Монако" билан амалдаги шартномаси 2028/29 йилги мавсум охиригача мўлжалланган.