“Ливерпул” собиқ ҳимоячиси Стивен Уорнок Арне Слотни танқид қилди
“Ливерпул” собиқ ҳимоячиси Стивен Уорнок клуб бош мураббийи Арне Слот берган интервьюдан кўнгли қолганини билдирди. Слот “Кристал Пэлас”га Лига Кубоги учрашувидаги мағлубиятни изоҳлар экан, таркиб чуқурлигининг етарли эмаслигини таъкидлаган эди.
Уорнокнинг айтишича, бу баёнот жуда ноаниқ ва ўз-ўзини оқлашга уриниш сифатида қабул қилинмоқда. “Агар таркиб чуқурлигига эга эмаслигингизни билсангиз, демак ёзги трансфер ойнасида яхши ишламагансиз”, деди Уорнок BBCга берган интервьюсида.
Шунингдек, мутахассис Слотни мураккаб жадвалдан шикоят қилмасликка чақирди, чунки клуб мавсумни қандай шароитда ўтказишини олдиндан яхши билган эди. Таъкидлаш жоизки, “Ливерпул” ёзги трансферларда янги футболчиларга қарийб 500 миллион евро сарфлаган.
Шу билан бирга, “Кристал Пэлас”га қарши ўйинларда мерсисайдликлар 2025/2026 йилги мавсумда кетма-кет учта мағлубиятга учраган.