3 ноябрдан Chevrolet Cobalt учун онлайн шартнома тузиш бошланади
2025 йил 3 ноябрдан бошлаб Chevrolet Cobalt автомобилларининг янгиланган версиялари расман сотувга чиқарилади. Компания маълумотига кўра, янги моделлар аллақачон барча расмий дилерлик марказларига етказиб берилган ва харидорлар уларни жонли кўриб, танишиш имконига эга бўлишмоқда.
Maзкур моделнинг оммалиги ва бозордаги юқори талабни ҳисобга олган ҳолда, шунингдек, ортиқча навбат ва ажиотаж ҳолатларини олдини олиш мақсадида “УзАуто Motors” акциядорлик жамияти Cobalt автомобилларига контрактация жараёнини фақат онлайн форматда ташкил этишини маълум қилди.
Компания маълумотида қайд этилишича, онлайн контрактация жараёнида Chevrolet Cobalt’нинг барча мавжуд комплектациялари, шу жумладан иккита янги тўплам варианти ҳам харидорлар ихтиёрига тақдим этилади. Бу харидорларга турли бюджет ва афзалликларга мос равишда танлов қилиш имконини яратади.
3 ноябр куни соат 10:00 дан бошлаб мижозлар Cobalt учун шартнома тузиш жараёнини “uz.avtosavdo.uz” сайти орқали амалга оширишлари мумкин бўлади. Барча маълумотлар, нархлар ва комплектация вариантлари шу платформада жойлаштирилади.
Шу билан бирга, айнан шу куни — 3 ноябрда — барча Chevrolet дилерлик марказлари вақтинча фаолиятини тўхтатади ва “УзАуто Motors” савдо тизимидан ажратилади. Бу чора онлайн контрактация жараёнини марказлаштириш ва шундай қилиб харидорлар учун тенг имконият яратиш мақсадида амалга оширилаётгани таъкидланмоқда.
Эслатиб ўтамиз, Chevrolet Cobalt Ўзбекистондаги энг кўп сотиладиган моделлардан бири бўлиб, сўнгги йилларда ҳам ишончлилиги, тежамкорлиги ва нарх-сифат мутаносиблиги билан кенг омма эътиборини қозонган. Янгиланган версияда ҳам юриш қулайлиги, хавфсизлик тизимлари ва ички интерер сифати янада яхшилангани маълум қилинмоқда.