Туркияда ўзбекистонлик эркак севгилисини ўлдириб умрбодга қамалди

Туркиянинг Истанбул шаҳрида содир бўлган жиноий фожиа мамлакат ва халқаро оммавий ахборот воситаларининг диққат марказига айланди. Маълум бўлишича, Ўзбекистон фуқароси Рустам Отамирзаев ўз ватандоши — Василахон Усмоновани пичоқлаб ўлдиргани учун оғирлаштирилган умрбод қамоқ жазосига ҳукм қилинди, деб хабар берди маҳаллий нашрлар.

Ҳодиса 18 апрель куни Пендик туманида юз берган. Тергов маълумотларига кўра, жуфтлик ўртасидаги жанжал давомида эркак аёлни уйнинг ертўласига олиб тушиб, аввал уриб-суриб, сўнг бир неча марта пичоқ билан зарба берган. Фожиадан сўнг у воқеа жойидан қочиб кетган.

Анадолу бош прокуратураси тайёрлаган айблов хулосасида айтилишича, судланувчига “қасддан одам ўлдириш” жинояти бўйича оғирлаштирилган умрбод қамоқ, шунингдек “қурол билан талончилик” учун қўшимча 10–15 йиллик жазо сўралган.

Суд жараёни Истанбулдаги 17-Оғир жиноят ишлари бўйича судда бўлиб ўтди. Рустам Отамирзаев судда айбини тан олди ва афсусини билдириб, 80 ёшли онасига ғамхўрлик қилиш учун енгилроқ жазо сўради.

Гувоҳлардан бири воқеани шундай тасвирлади: “Тонгда қичқириқ овозидан уйғондим. Судланувчи аёлни бўйнидан пичоқлаб, ертўлага судраб туширарди. Биз ёлвордик, лекин у тўхтамади. Бир неча дақиқа ичида аёл ҳаракатсиз қолди”.

Суд прокурори айбловни тўлиқ қўллаб-қувватлаб, айбдорни умрбод озодликдан маҳрум қилишни сўради. Суд ҳайъати ҳам айбловни асосли деб топди ва ҳукмни ўқиди — Рустам Отамирзаев қасддан одам ўлдиргани учун оғирлаштирилган умрбод қамоқ жазосига ҳукм этилди.

Бу фожиа нафақат Туркияда, балки Ўзбекистонда ҳам катта муҳокамага сабаб бўлди. Мутасаддилар таъкидлашича, бу воқеа рашк ва зўравонлик оқибатларининг яна бир даҳшатли намунасидир.