Тошкентда иссиқ сув сифати вақтинча ёмонлашди
Тошкент шаҳрининг айрим ҳудудларида аҳоли иссиқ сувнинг ранг ўзгариши — яъни занг тусида чиқиши бўйича шикоят қилмоқда, деб хабар берди “Veolia Energy Tashkent” компанияси.
Мутахассислар маълум қилишича, бу ҳолат вақтинча бўлиб, иситиш мавсуми олдидан қувурлардаги синов ишлари билан боғлиқ. Суғдланган тизимлар тикланаётгани сабабли сув қисқа вақтга жигарранг тус олиши мумкин.
Текширув натижасида айрим уйларда сув оқими қайтиш қувури орқали узатилгани аниқланган. Бу ҳароратнинг пасайиши ва темир зарраларининг чиқишига сабаб бўлган.
Компания ҳозир бошқарувчи ташкилотлар билан ҳамкорликда қувурларни тозалаш ва техник сувни чиқариш ишларини амалга оширмоқда.
Шунингдек, “Veolia Energy Tashkent” истеъмолчиларга мурожаат қилиб, сув сифати ташқи сабаблар билан ёмонлашган ҳолларда тўловлар қайта ҳисобланишини маълум қилди.
Мутахассислар таъкидлашича, бу ҳолат техник жараён бўлиб, тез орада сув сифатининг меъёрга келиши кутилмоқда.