Баҳром Ҳайдаров «Навбаҳор» мағлуб этилган ўйин ҳақида нималар деди?
«Қўқон-1912» бош мураббийи Баҳром Ҳайдаров Суперлиганинг 26-туридан ўрин олган «Қўқон-1912» — «Навбаҳор» (2:0) учрашувидан сўнг матбуот анжуманида журналистлар саволларига жавоб берди. Унинг фикрича, бу ғалаба жамоа учун ҳам, мухлислар учун ҳам катта аҳамиятга эга бўлди.
— Аввало, бугунги касб байрамини нишонлаётган ички ишлар ходимларини табриклаб ўтмоқчиман, — деди Ҳайдаров. — Улар сабаб футболимиз тинч ва тартибли ўтяпти. Энди ўйинга келсак, жуда оғир баҳс бўлди. «Навбаҳор»нинг мотивацияси юқори эди, биз ҳам буни кутгандик. Уларнинг қарши ҳужумларига тайёрландик, аммо гол уриш учун вақт керак бўлди. Дарвозабонимиз бир неча вазиятда жамоани қутқарди — унинг иштироки ғалабада муҳим рол ўйнади.
Мураббийнинг таъкидлашича, «Навбаҳор» футболчиси Азим Аҳмедовнинг 22-дақиқада олган қизил карточкаси ўйин оқимига таъсир қилган бўлса-да, бу ғалабани кафолатламади.
— Бир киши кўп бўлиб ўйнаш фақат устунлик бермайди, — деди Ҳайдаров. — Чунки баъзан камчиликда қолган жамоалар ҳам ғалаба қозониши мумкин. «Навбаҳор»да индивидуал жиҳатдан кучли футболчилар бор, улар билан эҳтиёткор ўйнаш талаб қилинди. Биз хатоларга йўл қўймасликка ҳаракат қилдик ва натижада ўз ўйинимизни топдик.
Журналистлар мураббийдан нега айрим яхши ўйнаб турган футболчиларни алмаштиргани ҳақида сўрашди.
— Мухлислар асосан тўп билан ҳаракатни кўришади, лекин биз мураббийлар тўпсиз ҳаракатни ҳам кузатамиз, — деди у. — Баъзи футболчиларни ўрта чизиқни кучайтириш мақсадида алмаштирдик. Бу тактик қарор эди. Мен учун энг муҳими — жамоада рақобат борлиги. Ҳозир жамоамда ҳар бир футболчи майдонга тушса, ўзини кўрсатишга тайёр.
Ҳайдаров чемпионлик учун кураш борасида ҳам ўз фикрини билдирди:
— Ҳар ўйиндан кейин «ким чемпион бўлади?» деган савол берилаяпти, лекин ҳозир аниқ фаворит йўқ, — деди у. — «Нефтчи» ва «Насаф»нинг имкониятлари тенг. Ҳар икки жамоа ҳам сўнгги тургача курашади. Бу мавсум жуда қизиқ бўлаяпти — футболчиларда ҳам, мухлисларда ҳам иштиёқ баланд.
Баҳром Ҳайдаров сўзини «Қўқон-1912» мухлисларига миннатдорлик билдириш билан якунлади:
— Бу ғалаба улар учун. Улар ҳар доим бизга ишонишади, ҳатто оғир пайтларда ҳам. Йигитлар бундай мухлислар учун майдонда жон куйдиришга арзийди, — деди мураббий.
Шу тариқа, «Қўқон-1912»нинг «Навбаҳор» устидан қозонган муҳим ғалабаси жамоани лига жадвалида 10-поғонага кўтарди ва чемпионат охиридаги кураш янада қизиқаётганини кўрсатди.
Манба: championat.asia