Ўз жазосини ўтаган ўсмирлар “судланган” деб саналмайди
Ўзбекистонда вояга етмаганларга нисбатан жиноий жавобгарлик тизими янада юмшатилди. Бу ҳақда 23 октябрь куни қабул қилинган “Вояга етмаганларга нисбатан жиноий жавобгарликни янада либераллаштириш тўғрисида”ги қонунда белгиланди, деб хабар берди расмий манбалар.
Янги ўзгаришларга кўра, 18 ёшга тўлгунча жиноят содир этиб, жазосини тўлиқ ўтаб бўлган шахслар энди судланмаган ҳисобланади. Бу норма ўсмирларнинг кейинги ҳаётига доғ туширмаслик ва жамиятга қайта мослашиш имконини беришга қаратилган.
Бироқ қонуннинг бу тартиби оғир ва ўта оғир жиноятлар содир этганларга ҳамда жазони ўтаб бўлганидан кейин яна жиноят қилганларга тааллуқли эмас.
Шунингдек, вояга етмаганлар учун озодликни чеклаш ёки озодликдан маҳрум этишнинг минимал муддати олти ойдан бир ойгача қисқартирилди.
Маълумот учун, мазкур қонун Қонунчилик палатаси томонидан 2023 йил 4 июлда қабул қилинган ва Сенат томонидан 2025 йил 1 августда маъқулланган.
Мутахассислар таъкидлашича, ушбу ўзгаришлар жазони ўтаган ўсмирларни ҳаётга қайтариш ва уларга иккинчи имконият беришни мақсад қилади.