“Санжик” алдов билан сотилган уйни болалар уйига эҳсон қилди
Ижтимоий тармоқларда муҳокама марказида бўлган ҳолат бўйича блогер ва тадбиркор Санжар Каримов (танилган тахаллуси “Санжик”) кутилмаган қарор қабул қилди. У алдов билан сотиб олинган деб ҳисобланган уйни болалар уйига ихтиёрий эҳсон сифатида топширди. Бу ҳақда блогер ўзининг Instagram саҳифасида маълум қилди.
Санжикнинг таъкидлашича, жамоатчиликнинг кўп қисми воқеага фақат шов-шув нуқтаи назаридан ёндашмоқда, аммо ҳеч ким жабрланувчига амалий ёрдам кўрсатишни таклиф этмаяпти.
“Биз катталар ва уламолар билан маслаҳатлашиб, уйни болалар уйига топшириш ҳақида қарор қилдик. Давлат номига нотариал тартибда эҳсон сифатида ҳадя этамиз. Бу ҳаммамиз учун сабоқ бўлсин”, — деди блогер.
Унинг сўзларига кўра, ҳар йили эҳсон ва закот бериб келади ва 2025 йил учун шу уйни болалар уйига топшириш орқали хайр-эҳсон қилишни маъқул кўрган.
“Етим болаларга бошпана ва меҳр керак. Улар ҳам бахтли яшашга ҳақли”, — деди Санжик.
Мутахассислар бу қарорни ижтимоий масъулиятнинг ёрқин намунаси сифатида баҳоламоқда.