Доннарумма дебют ўйинидаёқ АПЛ совринини қўлга киритди

«Манчестер Сити»нинг янги дарвозабони Жанлуижи Доннарумма Англия Премьер-лигасидаги илк мавсумини жуда ёрқин бошлади. 26 ёшли италиялик посбон дебют учрашувидаёқ сентябр ойининг энг яхши сейви соҳиби деб топилди.

Унинг бу муваффақияти «Манчестер Юнайтед»га қарши манкуниан дербида қайд этилган. Ушбу беллашувда Доннарумма Браян Мбемоннинг жуда хавфли зарбасини қайтариб, жамоасини аниқ голдан сақлаб қолганди. Ўйин 3:0 ҳисобида “Сити”нинг йирик ғалабаси билан якунланган.

Daily Mail нашрига берган интервюсида Доннарумма ўз ҳис-туйғулари билан ўртоқлашди:
— Дебютлар ҳеч қачон осон кечмайди, айниқса янги чемпионатда. Аммо бу ўйин мен учун алоҳида аҳамиятга эга бўлди. Тўғриси, бироз ҳаяжон ҳам бор эди, лекин мен уни енгдим деб ўйлайман. Бу клубнинг тарихига муносиб бўлиш мен учун катта шараф, — деди у.

Таниқли посбон “Сити” сафидаги илк ойларини жуда муваффақиятли бошлади. Ҳозиргача у барча мусобақалар доирасида 8 та учрашувда дарвозани қўриқлаб, уларнинг 5 тасида рақибларга гол уриш имконини бермади.

Таҳлилчиларнинг фикрича, Доннарумманинг келишидан сўнг “Сити” ҳимояси янада ишончли кўринишга эга бўлди. Унинг тезкор реакцияси, баланд сакраш қобилияти ва позицион ҳисси жамоа учун муҳим устунликка айланган.

Гвардиола эса шогирдини мақтаб, “Жанлуижи ҳали ўзининг энг яхши формасига чиқмаган бўлса ҳам, у қандай даражадаги дарвозабон эканини кўрсатди”, деган фикрни билдирган.

Маълумот учун, Доннарумма ёзда 35 миллион евро эвазига “ПСЖ”дан “Манчестер Сити”га кўчиб ўтганди. Унинг клуб билан тузган шартномаси 2030 йилгача мўлжалланган. Мухлислар эса уни келаси ўн йилликда “Этихад”нинг асосий қўриқчиси сифатида кўришни интизорлик билан кутмоқда.