Паррандаларга янги хавф: қуш гриппи

Европада қуш гриппи эрта мавсумдаёқ кенг тарқала бошлади. Мутахассисларнинг айтишича, бу сўнгги ўн йил ичидаги энг эрта ва кенг кўламли тарқалиш ҳисобланади. Ўнлаб мамлакатларда касаллик қайд этилаётгани парранда хўжаликларига ва озиқ-овқат таъминотига жиддий хавф туғдирмоқда. 2022-йилда шунга ўхшаш ҳолат натижасида миллионлаб парранда йўқ қилинган эди.

Касаллик, асосан, кўчиб юрувчи ёввойи қушлар орқали тарқалмоқда. Августдан октябрь ўрталаригача Европа Иттифоқининг ўн давлати ва Буюк Британияда 50 дан ортиқ ҳолат аниқланган. Энг кўп зарарланган мамлакатлар — Полша, Испания ва Германия. Мутахассислар вируснинг эрта тарқалиши бу йилги қиш мавсумини янада оғирлаштириши мумкинлигини огоҳлантирмоқда.

Белгияда ва Францияда янги ҳолатлар аниқлангач, ҳукуматлар барча паррандаларни ёпиқ жойларда сақлашни буюрди. Бу чора касаллик тарқалишини чеклаш учун зарур деб ҳисобланмоқда. Одатда бундай чоралар қишда қўлланилар эди, аммо бу сафар касалликнинг эрта тарқалиши ҳукуматларни олдиндан ҳаракат қилишга мажбур қилмоқда.

Жаҳон соғлиқни сақлаш ташкилоти вируснинг инсонларга юқиш хавфи пастлигини билдирган. Шунга қарамай, у ҳайвонлардан одамларга ўтиши мумкин бўлган ҳолларга эътибор билан қараш кераклигини эслатмоқда. Францияда ўрдакларга қарши эмлаш кампанияси бошланган бўлиб, бу касалликни жиловлашда муҳим қадам сифатида баҳоланмоқда.

Қуш гриппи Европадан ташқари АҚШ, Осиё ва бошқа минтақаларда ҳам кузатилмоқда. АҚШда 180 миллиондан ортиқ парранда йўқ қилинган, Бразилия эса касалликдан холи ҳудуд сифатида эълон қилинган.