Нигерияда қуролли гуруҳлар яна одам ўғирлаш тўлқинини бошлади
Нигерияда қуролли тўдалар навбатдаги қонли ҳужумни амалга оширди — Замфара штатидаги икки қишлоқда 73 нафар фуқаро ноқонуний равишда олиб кетилди, деб хабар берди Anadolu агентлиги.
Маҳаллий манбалар маълумотича, қуролли шахслар Бузугу ва Раяу қишлоқларига кечаси ҳужум қилган. Улар аҳолини қурол билан таҳдид қилиб, йирик гуруҳ ҳолатида одамларни ўғирлаб кетган. Ҳодиса давомида бир нечта фуқаро яралангани, айрим уйларга ҳам зиён етгани маълум қилинган.
Ҳукуматнинг билдиришича, воқеа жойига хавфсизлик кучлари жўнатилган ва ҳозирда тергов ишлари бошланган. Қуролли тўдаларнинг ҳаракат йўналиши аниқланмоқда, маҳаллий аҳоли эса ҳимоя кучайтирилишини талаб қилмоқда.
Нигерияда сўнгги йилларда қуролли гуруҳлар ва террористик ташкилотлар фаолияти кучайган. Улар орасида энг фаоллари сифатида “Боко Ҳарам” ва “ИШИД – Ғарбий Африка бўлими” (ISWAP) тилга олинади. Бу тузилмалар мамлакатнинг турли ҳудудларида мактаблар, йўловчилар ва қишлоқ аҳолисига қарши ҳужумлар уюштириб келади.
Қонунга кўра, одам ўғирлаш учун Нигерияда қатъий жазо — ҳатто ўлим ҳукми ҳам назарда тутилган. Бироқ бу чоралар ҳам воқеаларнинг олдини тўлиқ ололмаяпти. Мамлакат шимолида одам ўғирлаб товламачилик қилиш оддий жиноий даромад манбаи сифатида кенг тарқалган.