Тунис яқинида муҳожирлар кемаси ағдарилиб, 40 киши ҳалок бўлди

Тунис қирғоқлари яқинида яна бир фожиали денгиз ҳалокати содир бўлди. Маҳдия шаҳри прокуратураси вакили Валид Чтабрининг маълумот беришича, ҳалокатга учраган кема бортидан 40 нафар африкалик муҳожирнинг жасади топилган, яна 30 киши қутқариб қолинган. Бу ҳақда AFP агентлиги хабар берди.

Чтабрининг сўзларига кўра, дастлабки тергов натижалари кема бортда 70 киши бўлганини кўрсатган. “Топилганлар орасида гўдаклар ҳам бор”, — дея таъкидлаган прокуратура вакили. Ҳозирда қидирув-қутқарув ишлари давом этмоқда.

Бундай фалокатлар Тунис соҳилларида охирги йилларда тез-тез такрорланиб турибди. 2022 йилда ҳам мамлакат қирғоқлари яқинида муҳожирларни олиб кетаётган тўртта қайиқ ағдарилиб, камида 12 киши ҳалок бўлган, 10 нафар муҳожир бедарак йўқолган эди. У пайтда ҳам кемада 120 нафар киши бўлгани ва 98 нафари қутқариб қолингани маълум қилинганди.

Шунингдек, 2019 йилда Ливиядан келган муҳожирларни олиб кетаётган қайиқ Тунис яқинида ағдарилиб, 82 киши ҳалок бўлган, фақат тўрт киши тирик қолган эди.

Европа Иттифоқи 2019 йилда Ливия қирғоқларидаги қутқарув операциясини якунлаганини маълум қилганди. Бу операция давомида 650 мингдан зиёд муҳожир сувда қолган жойларидан қутқариб олинган эди. Аммо контрабандачилар ва муҳожирларни ноқонуний ташиш билан шуғулланувчи гуруҳлар фаолияти тўхтамаган — бу эса ҳар йили юзлаб бегуноҳ инсонларнинг ҳаётига зомин бўлмоқда.