60 млн евролик таклиф: Гвардиола Балде учун "Барселона" билан музокара бошлади
"Барселона" ҳимоячиси Алехандро Балде "Манчестер Сити" клуби рўйхатига киритилди. Euro-football.ru ёзишича, инглиз жамоасининг бош мураббийи Хосеп Гвардиола Балдени ўз сафига қўшишни истайди.
У бу борада "Барселона" спорт директори Деку билан музокара ўтказган. 2023 йилда "Манчестер Сити" Балдени сотиб олишга ҳаракат қилган, аммо "Барселона" молиявий қийинчиликларга қарамай, футболчини қўйиб юбормаган.
Ҳозирда каталонияликлар молиявий аҳволини барқарорлаштирди ва Балде жамоанинг асосий етакчиларидан бирига айланди. Шунга қарамай, Гвардиола Балдени ўз услубига мос футболчи деб ҳисоблайди ва уни қўлга киритиш ниятидан воз кечмаган.
21 ёшли испаниялик ҳимоячи "Барселона" билан 2028 йилгача шартнома тузган. Transfermarkt мутахассислари Балденинг нархини 60 миллион евро атрофида баҳоламоқда.