Антонио Конте: Кейинги сафар қамчи билан чиқаман майдонга

Европа Чемпионлар лигасининг 3-тур баҳси “Наполи” учун жуда оғир кечди. Неаполликлар сафарда Голландиянинг “ПСВ” жамоасига қарши беллашувда 2:6 ҳисобида мағлуб бўлишди. Учрашувдан сўнг жамоа бош мураббийи Антонио Конте матбуотга берган интервьюсида ўйин ҳақида танқидий ва бироз кинояли фикрларини билдирди, деб хабар берди Sky Sport.

“Ютқазсанг ҳаммаси ёмон, ютсанг ҳаммаси яхши. Ҳамма тўрт нафар яримҳимоячи билан ўйнаш қароримизни мақтаган эди. Биз уларга биргаликда ҳаракат қилиш имконини бердик, лекин иккита ҳужумкор қанот ўйинчиси билан жамоада мувозанатни сақлаш жуда қийин. Менимча, тўрт яримҳимоячидан бирини қурбон қилиш тўғри қарор бўлмасди”, — деди Конте.

У шундай қўшимча қилди: “Бугун анча сокин бўлдим. Аммо кейинги сафар қамчи олиб чиқаман — худди арслонбоқар сингари. Чунки баъзан шундан бошқаси таъсир қилмайди.”

Италиялик мутахассис жамоа ичидаги руҳий муҳит ҳақида ҳам тўхталиб ўтди. Унинг таъкидлашича, ўтган мавсумда футболчилар ўртасида бирдамлик ва жамоавий руҳ кучли бўлган, ҳозир эса янги келганлар шунга мослашиши керак. “Жамоада шахсий ёки эгоистик мақсадлар бўлмаслиги керак. Ҳар ким бир ғоя атрофида бирлашиши шарт”, — деди Конте.

Таҳлилчиларнинг фикрича, “Наполи”нинг бу мағлубияти тактик камчиликлар билан бирга, жамоавий ишонч етишмаслиги билан ҳам боғлиқ. Конте эса бу ҳолатни ўзгартириш учун шогирдларидан қаттиқ интизом ва масъулият талаб қилиш ниятида.

Маълумот учун, “Наполи” Чемпионлар лигаси жадвалида 3-турдан сўнг 3 очко билан 22-ўринда жойлашган. Жамоа кейинги турда ўз майдонида муҳим баҳсни ўтказиши кутилмоқда.