Дунёнинг энг қиммат автомобиль брендлари аниқланди
Interbrand консалтинг компанияси томонидан эълон қилинган глобал рейтингга кўра, жаҳон автомобиль саноатида бренд қиймати бўйича етакчиликни япон гиганти Toyota қўлга киритди. Компания 2025 йилдаги ҳисоб-китобларга кўра, ўз брендининг умумий қийматини 74,2 миллиард долларга етказган. Бу 2020 йилдан буён кузатилаётган барқарор ўсиш натижаси бўлиб, ҳар йили ўртача 2 фоизлик ўсишни намоён этмоқда.
Interbrand таҳлилчилари таъкидлашича, Toyota нафақат ишончлилик ва тежамкорлик, балки инновация ва барқарорлик соҳасидаги ютуқлари билан ҳам автосаноатда илгарилаб бормоқда. Компаниянинг гибрид ва электр технологияларига эътибори бренд қийматининг ошишига катта таъсир кўрсатган.
Рейтингда Mercedes-Benz иккинчи ўринни эгаллади. Бироқ унинг бренд қиймати 15 фоизга пасайиб, 50,1 миллиард долларга тушган. Бу билан у глобал брендлар ичида умумий ҳисобда 10-ўринни эгаллаб турибди. BMW эса 46,8 миллиард долларлик бренд қиймати билан учинчи ўринда жойлашди, шундай бўлса-да, унинг кўрсаткичи ҳам 10 фоизга камайган.
Қизиғи шундаки, Tesla рейтингида ҳам пасайиш кузатилган. Илгари глобал электр автомобиль бозорида етакчи ҳисобланган компания сўнгги бир йилда қийматининг 35 фоизини йўқотиб, ҳозирда 29,5 миллиард долларлик бренд қиймати билан фақат 25-ўринни эгаллаб турибди.
Шу билан бирга, Interbrand маълумотларига кўра, бу йилги рейтингда анъанавий Америка авто брендлари умуман йўқ. Улар ўрнини Хитойнинг замонавий ва тез ривожланаётган авто ишлаб чиқарувчилари эгаллай бошлаган. Бу эса жаҳон автомобиль бозорида кучлар мувозанати тобора ўзгараётганидан далолат беради.
Экспертлар фикрича, яқин йилларда электромобиллар, сунъий интеллект ва барқарор энергияга асосланган ишланмалар авто брендлар қийматида ҳал қилувчи омилга айланиши кутилмоқда.