“Қирол йўқ”: АҚШда Трампга қарши митинглар авж олди
18 октябрь куни Америка Қўшма Штатларида кенг кўламли норозилик намойишлари бўлиб ўтди. NBC News маълум қилишича, акциялар мамлакат президенти Дональд Трампнинг “авторитар бошқарув услуби ва коррупцияга мойил сиёсати”га қарши йўналтирилган.
Ташкилотчиларнинг ҳисоб-китобига кўра, 2700 дан ортиқ жойда митинглар ўтказилган ва уларда қарийб етти миллион киши иштирок этган. Энг катта намойишлар Вашингтон, Нью-Йорк ва Чикаго шаҳарларида бўлиб ўтди, деб хабар берди NBC News.
Иштирокчилар “Қирол йўқ”, “Демократия учун”, “Бойлар давлатни эгаллаб олмоқда” каби шиорларни кўтариб чиқди. Аксарият намойишлар тинч ўтган, Reuters’нинг ёзишича, полиция ҳибсга олиш ёки тўқнашув ҳолатларини қайд этмаган.
Митинглар Indivisible ҳаракати ташаббуси билан ташкил этилди. Ҳаракат раҳбари Лия Гринберг “Биз фақат тинч йўл билан фикримизни ифодалашни хоҳлаймиз. АҚШда ҳеч қачон қирол бўлмаган ва бўлмас ҳам”, деб таъкидлади.
Мутахассислар бу норозиликларни Трамп маъмурияти сиёсатига нисбатан кучайиб бораётган нафратнинг белгиси сифатида баҳоламоқда. Айниқса, мухолифларга нисбатан жиноий таъқиблар, қочқинларга қарши қаттиқ чоралар ва шаҳарларда тартибни сақлаш учун Миллий гвардия қўшинларидан фойдаланиш халқнинг сабрини синамоқда.
Республикачилар эса бу чиқишларни “Америкага қарши нафрат намойиши” деб атади. Уларга кўра, Трамп маъмуриятини қоралаш орқали мухолифлар мамлакатдаги сиёсий беқарорликни чуқурлаштирмоқда.
Намойишлар ҳукуматнинг бир қатор федерал идоралари фаолияти тўхтаб қолган ва минглаб давлат хизматчилари маошсиз таътилга чиқарилган вазиятда ўтди. Бу ҳолат жамиятда норозилик кайфиятини янада кучайтириб, июн ойидаги шунга ўхшаш чиқишлардан кейинги иккинчи тўлқин бўлди.