Бухоро ва Навоийда ноқонуний олтин қазувчилар қўлга олинди
Бухоро ва Навоийда ноқонуний олтин қазувчилар қўлга олинди, деб Uznews хабар берди.
«Контехназорат» инспекцияси томонидан Бухоро ва Навоий вилоятларида жойлашган бир қатор объектларда текширув ўтказилди. Ушбу тадбирлар чоғида «Oltin Kon» МЧЖга тегишли Шафиркон туманидаги «Қулжуқтов» ва Канимех туманидаги «Товшан» тоғ массивларида фуқаролар томонидан ноқонуний олтин қазиб олиш ҳолатлари аниқланди.
Материаллар ДХХга юборилди ва ҳужжатлар асосида махсус операция ўтказилди. Натижада «Қулжуқтов» массивида ноқонуний фаолият билан шуғулланаётган 37 нафар шахс ушланди.
Текширув давомида 3 та Ford автомобили, 8 та перфоратор, 6 та компрессор, тахминан 400 меш олтинли руда ҳамда турли қўлбола қурилмалар мусодара қилинди. Давлат ва жамиятга етказилган зарар миқдори 20 миллиард сўмдан ортиқ деб баҳоланмоқда.