ChatGPT'дан ҳам ақллироқ бўлган Grok 4 сунъий интеллекти тақдим қилинди

Илон Маск яратган сунъий интеллект Grok 4 эътибор марказида. Миллиардер тадбиркор ўзининг xAI стартапи орқали янги авлод чатботини оммага намойиш қилди. Ушбу чатботнинг салоҳияти шунчалик юқорики, тақдимот пайтида «ҳозирги кунда дунёда мавжуд энг ақлли нейросистема», дея таърифланди, деб ёзади Вloomberg.

Маскнинг таъкидлашича, Grok 4 нафақат бир неча университет битирувчилари даражасидаги ақлга эга, балки унинг функционал имкониятлари реал ҳаётда жуда кенг қамровли ҳисобланади. Масалан, бу сунъий ақл икки қора туйнукнинг ўзаро тўқнашувини илмий асосда моделлаштира олади, спорт баҳсларининг натижаларини букмекерлар коэффициентига асосланган ҳолда башорат қилиши мумкин ва ҳатто мустақил равишда бизнес юритиш қобилиятига ҳам эга.

Янада қизиғи, Grok 4 Марсни мустамлака қилиш бўйича SpaceX лойиҳаларида ҳам фойдаланиш учун мўлжалланган. Маск бу нейроинтеллектни ҳатто физиканинг янги қонунларини очишда қўллаш ниятида.

Таъкидланишича, Grok 4 овозли мулоқот соҳасида ҳам жиддий ютуқларга эришган. У шивирлаш, куйлаш, турли нутқ интонацияларини ишлатишни ўрганиб, реал одам сингари мулоҳаза қилиш даражасига етиб келган.

xAI компанияси олиб борган тест синовларига кўра, Grok 4 бозордаги бошқа рақобатдош нейротармоқлардан, жумладан ChatGPT’дан юқори самарадорлик кўрсатган. Бу эса уни интеллектуал мулоқот дунёсидаги янги лидерга айлантириши мумкинлигини англатади.

Гап нархларга келганда, Grok 4’нинг асосий версиясига фойдаланувчилар ойига 30 долларлик обуна орқали эга бўлишлари мумкин. Тўлиқ имкониятлар, яъни SuperGrok Heavy учун эса ҳар ой 300 доллар тўлаш талаб қилинади.

Муттахассислар фикрига кўра, Grok 4 келажакда нафақат технология, балки фан, тиббиёт ва бизнес соҳаларида ҳам инқилобий ўзгаришларга замин яратиши мумкин. Чунки у — фақат бот эмас, балки сунъий ҳамда эволюцион ақлнинг реал намунасидир.