Юрген Клопп: "Мураббийликсиз ҳаётимда тўкислик бор, ҳеч нарсани соғинмаяпман"
"Яқинда кимдир менга: 'Яқин орада яна мураббий бўласан', деди. Лекин ички туйғуларим буни инкор этади", — дея таъкидлади собиқ "Ливерпуль" бош мураббийи. Унинг айтишича, бу қарор ортида шунчаки чарчоқ ёки тўсатдан юзага келган кайфият эмас, балки ҳаётий устуворликлар ўзгаргани ётади.
Клопп “Ливерпуль”даги даврини ажойиб деб баҳолайди ва у ердаги хотиралар фақат илиқ туйғулар қолдирганини алоҳида урғулайди. “Мен ҳеч нарсани соғинмаяпман. Мураббийликни яхши кўрардим, лекин бу мен учун ҳаётий эҳтиёж эмас эди”, — дейди мутахассис. Унинг сўзларидан англашиладики, футбол дунёсидаги катта босим, чексиз интизом ва руҳий чарчоқ ҳамда ишдаги қийин қарорлар уни ҳаётга ва вақтга бўлган муносабатини ўзгартирган.
Айни пайтда Юрген Клопп “Red Bull” компаниясида футбол бўйича раҳбар сифатида янги вазифада фаолият юритмоқда. Бу эса унга иш ва шахсий ҳаёт ўртасида мувозанат сақлаш, янги тажриба тўплаш ва ҳаётдан завқ олиш имконини беряпти.
Клоппнинг бу қарорини кўпчилик тушуниши мумкин — у 20 йилдан зиёд мураббийлик фаолиятида турли босқичларни босиб ўтди, “Майнц”, “Боруссия Дортмунд” ва “Ливерпуль” клубларида улкан ютуқларга эришди. Аммо энди у ўзини бошқа ролда, камтар ва ҳаётий ёндошув билан синаб кўришни маъқул кўряпти.
Клопп ҳақидаги бу янгилик мухлислар учун бироз афсусли туюлиши мумкин. Лекин, шу билан бирга, унинг сўзлари ҳаётда ҳар бир инсон учун тинчлик ва ички қониқиш қанчалик муҳим эканини эслатиб қўяди. Балки бу – келажакда яна янги муваффақиятларга йўл очувчи танаффусдир.
Яқин йилларда Клоппни яна катта футболда кўриш мумкинми ёки у умуман бошқа йўналишда қоладими — бу саволга вақт жавоб беради. Аммо бир нарса аниқ: Юрген Клопп футболдаги ўз сўзини айтиб бўлган, энди эса ҳаётнинг бошқа йўналишларида ўзини топяпти.