Қазақстан 46 миллиард теңге қарыз алады: Сенат келісімді ратификациялады

Сенат пленарлық отырыста Қазақстан мен Халықаралық қайта құру және даму банкі арасындағы 46 миллиард теңге мөлшеріндегі қарыз туралы келісімді ратификациялады, - деп хабарлайды Tengrinews.kz тілшісі.
Бұл қаржы қайда жұмсалмақ?"Қазақстанның инклюзив экономикасы үшін жеделдетілген цифрландыру" жобасы туралы сөз болып отыр. Оның мақсаты - тұрақты цифрлық инфрақұрылымды дамыту және ауыл тұрғындарын жоғары жылдамдықтағы интернетпен қамтамасыз ету.
Негізгі міндеттер қатарына:

қала мен ауыл арасындағы цифрлық теңсіздікті азайту үшін ауылдарды интернетке қосу;өңірлердегі шағын және орта бизнесті, қашықтан қызмет көрсетуді және инвестицияларды қолдау;мемлекет пен жеке сектордың серіктестігі арқылы телеком-инфрақұрылымды дамыту жатады.

Жоба республикалық бюджеттен қосымша қаражатты талап етпейтіні және теріс әлеуметтік-экономикалық салдарға әкеп соқпайтыны айтылды.
Халықаралық қайта құру және даму банкі (ХҚДБ) - дүниежүзілік банктің негізгі кредиттік мекемесі, БҰҰ мамандандырылған мекемесі, 1944 жылы Халықаралық валюта қорымен бір мезгілде құрылған мемлекетаралық инвестициялық институт.
Сілтемесіз жаңалық оқисыз ба? Онда Telegram желісінде парақшамызға тіркеліңіз!