Екібастұз вокзалы 25 жылда алғаш рет толық жөндеуден өтті
Инженерлік желілер, жылу және қолжетімділік
Жөндеу жұмысының барысында инженерлік желілер толығымен ауыстырылып, қабырғалар жылы қаптамамен қапталып, қос жылу жүйесі орнатылды. Ғимаратта лифт, ана мен балаға арналған бөлме, ойын аймағы және намазхана мен хостел пайда болды.
"Екібастұз вокзалында 2001 жылдан бері күрделі жөндеу жұмысы жүргізілген жоқ. Осы уақыт аралығында бекет елдегі ең суық вокзалға айналды десек болады. Қазір бұл мәселе шешімін тапты. Жөндеу жұмысы жүргізілген қыс мезгілінде ғимаратқа екі жылу жүйесі орнатылғандықтан біз іште тіпті футболкамен жүрдік. Енді ғимараттың әр қанаты дербес жылытылады", - дейді Павлодар вокзалының басшысы Дастан Махметов.
Екібастұз вокзалының аумағы шамамен 2300 шаршы метрді құрайды. Бұрын оның 60%-ы қаңырап бос тұратын. Себебі кәсіпкерлердің ескірген суық ғимаратта сауда орындарын жалға алу ниеті болмады. Ал қазір бірінші қабатта буфет, үшінші қабатта ірі транспорттық компанияның кеңсесі орналасқан. Енді бекеттің бір бөлігін жергілікті суретшілердің туындылары қойылатын шығармашылық кеңістікке айналдыру ниеті бар.
Жолаушылар пікірі
"Айырмашылық жер мен көктей. Бұрын вокзал жұпыны, тозыңқы еді. Ал қазір мұнда қолайлы, әрі жарық. Түнде ғимарат әдемі жарықпен көмкеріліп тұрады. Мүгедек адамдардың вокзал қызметкерлерін шақыруына арналған арнайы тетік орнатылған", - дейді Екібастұзға іссапармен келген Дархан Ахметов есімді жолаушы.
KAZ Minerals қолдауы
Вокзалды жөндеу жұмысы туралы мәселе көптен көтеріліп келген еді. 2023 жылы Павлодар облысының әкімі Асайын Байханов аймақтағы жұмыс сапары барысында тиісті басқармаға ғимаратты жөндеу үшін арнайы жобалық-сметалық құжаттарды дайындауды тапсырған болатын. Жобаға KAZ Minerals Тобы қаржылай қолдау көрсетіп 987 миллион теңге бөлді.
"Екібастұзға келген жанның назары бірден теміржол вокзалына түседі. Оның заманауи, әрі ыңғайлы ғимаратқа айналғаны бізді қуантады. Қазіргі таңда пойыздар – Қазақстандағы негізгі тасымал көліктерінің бірі, сол себепті мұндай нысандардың адамдар үшін қолайлы болғаны маңызды. Біз бұл жобаның жүзеге асуына көмектескенімізге қуаныштымыз", - дейді "KAZ Minerals Bozshakol" ЖШС бас директоры Джейми Каратти.
Бүгінде Екібастұз теміржол вокзалы тәулігіне 18 пойызды қарсы алып, 2500 шамасындағы жолаушыға қызмет көрсетеді.
Суреттер: KAZ Minerals Тобы