Ўзбекистонликлар учун АҚШ визасини олиш янада қийинлашди: рад этишлар рекорди
B-1/B-2 визалари — туризм, қариндошлар билан учрашув, даволаниш ва ишбилармонлик сафарлари учун бериладиган қисқа муддатли виза тури ҳисобланади. Аммо сўнгги йилларда ушбу виза учун рад этиш ҳолатлари кескин ошган. Масалан, 2023 йилда ҳам ушбу тоифадаги визани олиш учун мурожаат қилган ўзбекистонликларнинг 59,56 фоизи рад жавоби олган эди. Яъни охирги икки йилда рад этиш кўрсаткичи 5 фоизга ошди.
Марказий Осиёдаги қўшнилар билан таққослаганда, Ўзбекистон ушбу нохуш рўйхатда биринчи ўринни эгаллади. Туркманистон фуқароларининг 58,8 фоизига, Қозоғистонликлардан 46,29 фоизига, Тожикистон фуқароларидан 45,24 фоизига, Қирғизистонликлардан эса 39,14 фоизга рад жавоби берилган.
Дунё миқёсида энг кўп рад этилганлар — Лаос (82,84%), Сомали (77,02%), Гвинея-Бисау (76,59%), Сенегал (74,65%) ва Гвинея (70,25%). АҚШ визасини олиш бўйича энг кам рад жавоби олганлар — БАА (1,46%), Кипр (2,16%) ва Руминия (2,61%) давлатлари бўлди.
Бундан ташқари, сўнгги йилларда АҚШ элчихонаси талаблари ҳам кескин кучайтирилди. Масалан, АҚШнинг Тошкентдаги элчихонаси таълим ёки алмашинув дастурларида иштирок этиш учун ариза топширган ўзбекистонлик талабалардан барча ижтимоий тармоқ аккаунтларидаги махфийлик созламаларини “оммавий” ҳолатга ўтказиш талаб қилинади. Бу талаб — Америкага кириш ҳуқуқини аниқлаш учун қўшимча текширувларни енгиллаштириш мақсадида жорий этилган. Элчихона таъкидлашича, мазкур маълумотларни тақдим этмаслик, виза олиш ҳуқуқидан маҳрум бўлишга сабаб бўлиши мумкин.
Экспертлар таъкидлашича, бу тенденция — АҚШнинг хавфсизлик ва назорат чораларини кучайтириш сиёсати билан боғлиқ бўлиб, айниқса, Марказий Осиё каби минтақа фуқаролари учун виза олиш жараёни янада мураккаблашмоқда. Бир сўз билан айтганда, Америкага саёҳат қилиш нияти бор ўзбекистонликлар бугун синовли ва мураккаб қоидаларга дуч келишмоқда.
Zamin.uz таҳририяти вазият ривожини кузатиб боради ва юртимиз фуқаролари учун энг долзарб янгиликларни тезкор етказиб боради.