Эрон сулҳга рози бўлди - ОАВ

АҚШ Президенти Доналд Трамп сешанба куни Исроил ва Эрон ўртасида ўт очишни тўхтатиш битими кучга кирганини айтиб, ҳар икки томон бу келишувни бузмасликка чақирди. Бу, 12 кунлик урушга якун ясалиши умидини уйғотди, гарчи ҳар икки давлатда ҳам ҳалокатли ҳужумлар ҳақида хабарлар берилган бўлса-да.

Исроил Бош вазири Бенямин Нетаняху Трампнинг ўт очишни тўхтатиш таклифини қабул қилганини айтиб, Исроил Эронга тегишли ядро ва баллистик ракета таҳдидини бартараф этиш мақсадига эришганини билдирди. Шу билан бирга, у келишув бузилса, кескин жавоб берилишидан огоҳлантирди, дейилади унинг идораси баёнотида.

Трамп илгарироқ ўзининг Truth Social платформасида шундай ёзди: “ЎТ ОЧИШ ТЎХТАТИЛДИ. ИЛТИМОС, УНИ БУЗМАНГ!”

Ушбу баёнот Эрондан келган навбатдаги ракета ҳужуми ортидан янгради. Бу ҳужумда Исроил тез ёрдам хизмати маълумотига кўра, тўрт киши ҳалок бўлган. Эрон эса сешанба куни эрталаб мамлакат шимолидаги ҳужумда тўққиз киши ҳалок бўлганини билдирди.

Душанба куни Трамп урушни тугатиш мақсадида тўлиқ ўт очишни тўхтатиш режимини эълон қилганида, у Исроил ва Эронга олиб борилаётган операцияларни якунлаш учун вақт берилишини, шундан сўнг босқичма-босқич сулҳ кучга киришини таъкидлаган эди.

Унинг баёноти якшанба кунидан бошлаб кучайган можаро фонида янгради. Ўшанда АҚШ Эроннинг ядро объектларини бомбардимон қилган, Эрон эса душанба куни Қатар ҳудудидаги АҚШ базасига ракеталар йўллаб жавоб қайтарган эди.

Сешанба куни эрта тонгда гувоҳлар Тел-Авив ва жанубий Исроилнинг Беершева шаҳарлари яқинида портлашларни эшитганини айтишган. Эроннинг SNN ахборот агентлиги Теҳрон сулҳ кучга киришидан олдин ракеталарнинг сўнгги зарбасини берганини хабар қилди.

Исроил армияси Эрондан олти тўлқин ракета ҳужуми бўлганини билдирган, мамлакат миллий тез ёрдам хизмати эса Беершевада тўрт киши ҳалок бўлганини маълум қилган.

Эронда эса шимолдаги Гилон вилояти губернатор ўринбосари сешанба куни эрталаб содир бўлган “террорчилик ҳужуми” натижасида тўртта турар жой бутунлай вайрон бўлганини ва тўққиз киши ҳалок бўлганини, 33 киши жароҳат олганини айтган. Бу ҳақда Эроннинг Тасним агентлиги хабар берган.

Расмий бу ҳужумни Исроил амалга оширганини аниқ айтмаган, аммо Эроннинг Nournews ахборот агентлиги ядро олими Муҳаммадризo Сoдиқининг ушбу ҳужумда ҳалок бўлганини ва бу сулҳ кучга киришидан олдинги Исроил ҳужуми бўлганини билдирган.

Оқ Уйдаги юқори мартабали амалдор Трамп бу сулҳ битимини Нетаняху билан телефон орқали муҳокама қилиб келишганини, Исроил эса Эрон бошқа ҳужум қилмаса, рози бўлганини билдирган.

“Ҳаммаси режа асосида ишласа – ва бу шундай бўлади – мен ҳар икки давлат, Исроил ва Эронга урушни тўхтатиш учун керакли матонат, жасорат ва ақлни намоён этгани учун табрикларимни билдираман. Бу уруш '12 КУНЛИК УРУШ' деб номланиши керак”, – деб ёзди Трамп Truth Social'да.

Эрон расмийси ҳам Теҳрон сулҳга рози бўлганини тасдиқлаган, аммо мамлакат ташқи ишлар вазири Исроил ҳужумларни тўхтатмагунча ҳаракатлар тўхтамайди, деб айтган.