25 июнь: Ўзбекистонда шамолли ва чангли иссиқ кунда нималар кутиляпти?
Тошкент шаҳрида ҳаво бироз булутли бўлади. Ёмғир кутилмайди. Шамолнинг тезлиги 5–10 м/с бўлиб, айрим пайтларда 15 м/с гача кучайиши ва чанг-тўзон кўтарилиши эҳтимоли бор. Кечаси ҳарорат 25–27 даража, кундузи эса 38–40 даражани ташкил этади.
Қорақалпоғистон ва Хоразмда айрим жойларда қисқа муддатли ёмғир ва момақалдироқ кузатилиши мумкин. Шамол баъзи ҳолатларда 22 м/с гача етади. Кечаси 18–23, кундузи 26–31 даража бўлиши кутилмоқда.
Бухоро ва Навоий вилоятларида асосан қуруқ ва бир оз булутли об-ҳаво сақланиб туради. Навоийнинг шимолида қисқа муддатли ёмғир кузатилиши мумкин. Ҳарорат 33–38 даражага етиши кутилмоқда.
Тошкент, Сирдарё, Жиззах ва Самарқанд вилоятларида ҳам ҳаво қуёшли ва шамолли бўлади. Кундузи ҳарорат 35–40 даража, кечаси эса 22–27 даража атрофида бўлади.
Қашқадарё ва Сурхондарёда эса ҳаво янада иссиқроқ – 38–43 даража. Бу ҳудудларда ҳам шамоллар кучайиб, айрим жойларда чанг кўтарилиши мумкин.
Андижон, Наманган ва Фарғона водийсидаги вилоятларда об-ҳаво ўхшаш ҳолатда бўлади. Ҳарорат кечаси 22–27, кундузи эса 35–40 даражани ташкил этади.
Тоғли ва тоғолди ҳудудларда эса нисбатан салқинроқ ҳаво сақланиб туради. Бу ҳудудларда ҳарорат 28–33 даражагача етиши мумкин. Ҳаво бир оз булутли, ёмғир кутилмайди.
Мутахассислардан огоҳлантирув
Фавқулодда вазиятлар вазирлиги ва СЭС қўмитаси аҳолини иссиқдан эҳтиёт бўлишга чақирди. Хусусан, соат 10:00 дан 17:00 гача қуёш нурлари остида юрмаслик, танада енгил ва оч рангли кийимлар кийиш, кўпроқ сув истеъмол қилиш ва болаларни шамолсиз ва иссиқ жойларда қолдирмаслик бўйича тавсиялар берилди.
Шу билан бирга, ҳафта охирига бориб ҳарорат яна кўтарилиши кутилмоқда. Демак, шундай об-ҳаво шароитида эҳтиёткорлик ва соғлиққа эътибор жуда муҳим.