Турки Ал аш-Шайх Англиянинг “Бристоль Сити” клубини сотиб олмоқчи

Англия Чемпионшипида ўйнаётган “Бристоль Сити” футбол клуби келажакда янги эгасига эга бўлиши мумкин. “The Sun” нашри тарқатган хабарга кўра, Саудия Арабистонидаги кўнгилочар тадбирлар бўйича Бош бошқарма раҳбари, машҳур бизнесмен ва спорт энтузиасти Турки Ал аш-Шайх ушбу жамоани сотиб олиш имкониятини синчиклаб ўрганмоқда.

Маълумотларга кўра, “Бристоль”га ҳозирда Лэнсдаунлар оиласи эгалик қилади ва улар клубни сотишни режалаштирмаётганини билдиришган. Бироқ Ал аш-Шайх томонидан таклиф этилаётган молиявий шартлар ўта манфаатли бўлиши мумкин ва бу қарорни ўзгартиришга туртки бериши эҳтимолдан холи эмас.

Эслатиб ўтамиз, бу саудиялик тадбиркорнинг илк маротаба Англия клубларига қизиқиши эмас. Аввалроқ у “Миллуолл” ва “Саутгемптон” клублари билан ҳам алоқа ўрнатишга уриниб кўрганди. Унинг футбол соҳасига қизиқиши, айниқса, сўнгги йилларда жаҳон миқёсидаги спорт лойиҳаларини молиялаштираётгани билан боғлиқ. Турки Ал аш-Шайх нафақат мамлакат ичида, балки халқаро спорт бозорида ҳам таъсир доирасини кенгайтирмоқда.

“Бристоль Сити” ўтган мавсумда Чемпионшип мусобақасини 6-ўринда якунлаб, АПЛга чиқиш учун плей-офф ўйинларига йўл олганди. Бироқ ярим финалда “Шеффилд Юнайтед” билан кечган икки учрашувда 0:6 ҳисобида мағлуб бўлиб, элита лига йўли ёпилди.

Мавжуд вазият шуни кўрсатмоқдаки, катта сармоядорнинг келиши клуб учун янги имкониятлар эшигини очиши мумкин. Кучли молиявий база ва глобал алоқалар “Бристоль Сити”ни нафақат АПЛ, балки Европа миқёсида ҳам рақобатбардош клубга айлантириши эҳтимоли йўқ эмас.

Турки Ал аш-Шайхнинг қароридан кейин “Бристоль” футбол дунёсидаги навбатдаги “саудия лойиҳаси”га айланиши мумкин. Бу эса клубнинг трансфер сиёсати, инфратузилмаси ва маркетинг стратегиясида туб ўзгаришларга сабаб бўлиши кутилмоқда.