Тошкент аэропортида капсула меҳмонхона очилди

Тошкент халқаро аэропортида «Qo‘noq» бренди остидаги капсула меҳмонхона расман очилди, деб Uzbekistan Airports хабар қилди. У терминалнинг рўйхатдан ўтиш (регистрация) қисмида — ностерил зонада жойлашган. Энди йўловчилар рейс олдидан кутиш жараёнида қулай дам олиш имконига эга.

Мини-отел 6 та замонавий капсуладан иборат: 4 та стандарт ётоқли бир кишилик капсула ва 2 та оилавий (икки кишилик) капсула.

Ҳар бир капсула индивидуал ёпиқ ҳудуд бўлиб, шовқиндан ҳимояланган. Унда қулай ортапедик матрасли крават, ётоқ жиҳозлари, вентиляция тизими, ёруғликни бошқариш, розеткалар ва USB-портлар мавжуд. Шунингдек, шахсий сейф, ойна, кийим илгич ва соатли экран ҳам мавжуд. Капсулада оптимал микроклимат таъминланади.

Тарифлар:

Якка капсула учун:
. 4 соатгача – 400 000 сўм
. 6 соатгача – 600 000 сўм
. 8 соатгача – 800 000 сўм

Оилавий капсула учун:
. 4 соатгача – 600 000 сўм
. 6 соатгача – 800 000 сўм
. 10 соатгача – 1 000 000 сўм

Бу капсула отель транзит йўловчилар ва рейс олдидан бир неча соат олдин етиб келувчи йўловчилар учун жуда қулай ечим ҳисобланади.

Эслатиб ўтамиз, «Qo‘noq» бренди остидаги бошқа бир меҳмонхона Тошкент аэропортининг стерил зонасида икки йилдан бери фаолият юритмоқда.