“Олтин тўп” учун асосий даъвогар ўзгарди: Витинья рейтингда биринчи

Европа футболидаги йилнинг энг нуфузли индивидуал мукофоти — “Олтин тўп” учун кураш қизғин паллага кирди. Maшҳур "TNT Sports" портали ҳар йили анъанавий тарзда эълон қиладиган рейтингнинг сўнгги нашрида асосий интрига рўй берди: “Пари Сен-Жермен” (ПСЖ) ярим ҳимоячиси Витинья 2025 йилги мукофот учун асосий фаворит сифатида эътироф этилди ва узоқ вақт давомида етакчиликни қўлда ушлаб турган жамоадоши Усмон Дембелени, шунингдек, “Барселона”нинг ёш истеъдоди Ламин Ямални ортда қолдирди.

Витинья нега фаворитга айланди?

Португалия терма жамоаси аъзоси Витинья учун 2024/25 йилги мавсум ҳақиқий парвоз даври бўлди. Парижликлар билан бирга у тўртта йирик титулни қўлга киритди — Франция чемпионати, Кубоги, Лига Кубоги ва Суперкубогини ўз ғазнасига жойлади. Фақат бу эмас, Витинья Португалия терма жамоаси сафида Миллатлар Лигасида ҳам бош совринга эга чиқди ва асосий фигуралардан бирига айланди.

Унинг жамоадоши Усмон Дембеле рейтингда иккинчи поғонага тушди. Франциялик ҳужумкор ўйинчи ҳам мавсумни жуда юқори савияда ўтказган, лекин Витиньянинг универсаллиги ва ҳал қилувчи ўйинлардаги катта таъсири мутахассислар эътиборини кўпроқ тортгани аниқ.

Учинчи ўринда эса — “Барселона”нинг ёш иқтидори Ламин Ямал. Ёшгина бўлишига қарамай, у жамоанинг асосий кучларидан бирига айланиб улгурди ва катта умид билан қаралаётган номзодлардан бири саналади.

Родрининг "Олтин тўп"и ва янги давр

Сўнгги “Олтин тўп” мукофоти “Манчестер Сити” ярим ҳимоячиси Родрига топширилган эди. Уни мисли кўрилмаган даражадаги универсал ва барқарор ўйинлари билан тан олишди. Аммо янги мавсумда Европа футболи саҳнасида Витинья, Дембеле ва Ямал каби янги юлдузлар порламоқда.

Яна бир муҳим жиҳат шундаки, TNT Sports’нинг “Олтин тўп” пойгасидаги фаворитлари жамоавий ва шахсий ютуқлар, мавсум давомидаги барқарорлик ва ҳал қилувчи ўйинларда кўрсатган маҳоратига кўра баҳоланмоқда.

Қуйида TNT Sports’нинг сўнгги рейтинги:

1. Витинья (“ПСЖ” ва Португалия)
2. Усмон Дембеле (“ПСЖ” ва Франция)
3. Ламин Ямал (“Барселона” ва Испания)

Олдинги йилларда бу рўйхатнинг юқори қисмида Мбаппе, Холанд, Месси, Бензема каби юлдузлар бўларди. Энди эса европа футболи янги лидерларга ишонч билдирмоқда.