ABŞ Eýrana Hormuz bogazyny petiklemek ýa-da jogap zarbalaryny urmak synanyşygyndan saklanmak barada duýdurdy
ABŞ-nyň döwlet sekretary Marko Rubio, Birleşen Ştalaryň Eýranyň ýadro desgalaryna uran zarbalaryndan soň, Tähranyň jogap hüjümlerinden saklanmalydygy barada duýduryş berdi. Onuň aýtmagyna görä, beýle hüjüm “olaryň öňki-soňky etjek iň uly ýalňyşlygy bolar”. Şeýle hem Rubio Eýranyň Hormuz bogazyny petiklemek synanyşyklaryndan gaça durmalydygyny aýtdy.
Hormuz bogazy Pars we Oman aýlyklaryny birleşdirýär we dünýäde sarp edilýän nebitiň takmynan 20%-i bu ýerden geçirilýär.
Rubio bu barada 22-nj iýunda “Fox News” teleýaýlymynyň irdenki gepleşiginde çykyş edip, bogazy petiklemek synanyşyklaryna diňe bir ABŞ-nyň däl, beýleki ýurtlaryň hem jogap berjekdigini aýtdy. Döwlet sekretary Tähranyň bu mümkin hereketleriniň öňüni almak maksady bilen, Pekin bilen hem aragatnaşyga geçendigini mälim etdi.
Rubio ABŞ-nyň Eýrana garşy giň gerimli harby operasiýa meýilleşdirmeýändigini we Tähran bilen gepleşikleri dowam etdirmek mümkinçiliginiň saklanyp galýandygyny belledi.
Ol ýadro desgalaryna urlan zarbalaryň öňde goýlan maksadyna ýetendigini nygtap: “Olaryň ýadro ýaragyny döretmek üçin ähli zerur serişdeleri bardy. Häzir beýle mümkinçilik ýok” diýdi.
Azatlyk Radiosynyň Eýran gullugy, ýagny Radio Fardanyň maglumatyna görä, Eýranyň bir palatadan ybarat mejlisi hökümetden Hormuz bogazyny petiklemegi talap edipdir.