ირანმა ორმუზის სრუტის დაკეტვას მხარი დაუჭირა - აშშ ამას საშინელ შეცდომას უწოდებს
ირანის პარლამენტმა სტრატეგიულად მნიშვნელოვანი ორმუზის სრუტის დახურვას მხარი დაუჭირა მას შემდეგ, რაც აშშ-მ ირანის ბირთვულ ობიექტები დაბომბა.
ირანელმა კანონმდებელმა, ეროვნული უსაფრთხოებისა და საგარეო პოლიტიკის პარლამენტის კომიტეტის წევრმა, ესმაილ კოსარიმ განაცხადა, რომ ირანის პარლამენტი - მეჯლისი დათანხმდა გლობალური ენერგოვაჭრობის საკვანძო არტერიის დახურვას სწორედ „ამერიკული აგრესიისა და საერთაშორისო საზოგადოების დუმილის საპასუხოდ“.
მისი თქმით, ამ საკითხზე კანონმდებლებმა კონსენსუსს მიაღწიეს, თუმცა საბოლოო გადაწყვეტილება ირანის უზენაესი ეროვნული უსაფრთხოების საბჭოს ეკუთვნის.
სპარსეთის ყურეში მდებარე ორმუზის სრუტე გლობალური ვაჭრობის ერთ-ერთი ყველაზე მნიშვნელოვანი პუნქტია, რომლის გავლითაც მსოფლიო ნავთობის დაახლოებით 20 პროცენტი გადის, რაც დღეში დაახლოებით 17-18 მილიონი ბარელი ნავთობია.
ორმუზის სრუტე ერთადერთი საზღვაო გზაა, რომელიც სპარსეთის ყურეს ღია ოკეანესთან აკავშირებს და მის სანაპიროებთან ნავთობის ისეთი მსხვილი მწარმოებლები არიან, როგორებიცაა ირანი, საუდის არაბეთი, ერაყი, ქუვეითი და არაბთა გაერთიანებული საამიროები.
საერთაშორისო მედია წერს, რომ ამ საზღვაო მარშრუტის დახურვა, სავარაუდოდ, შეაფერხებს ნავთობის გლობალურ მიწოდებას, რაც ფასების მკვეთრ ზრდას გამოიწვევს და შესაძლოა, დროებით შეზღუდოს აშშ-ის სამხედრო გემების სპარსეთის ყურიდან გასვლის შესაძლებლობაც.
აშშ-ს სახელმწიფო მდივანი, მარკო რუბიო მოუწოდებს ჩინეთის მთავრობას, რომ ამ საკითხთან დაკავშირებით დაუკავშირდნენ ირანელებს, რადგან ისინი თავად მნიშვნელოვნად არიან დამოკიდებული ორმუზის სრუტეზე ნავთობის ტრანსპორტირების თვალსაზრისით.
აშშ-ს სახელმწიფო მდივანი აცხადებს, რომ ირანის მხრიდან ორმუზის სრუტის ჩაკეტვა საშინელი შეცდომა და „ეკონომიკური თვითმკვლელობა“ იქნება.