ისრაელმა და ირანმა ცეცხლი გაცვალეს უშედეგო დიპლომატიური ძალისხმევის ფონზე
ირანმა და ისრაელმა კონფლიქტის მეორე კვირას ერთმანეთზე საჰაერო დარტყმები განახორციელეს. პარასკევის დიპლომატიური ძალისხმევის შედეგად კი მნიშვნელოვანი პროგრესის ნიშნები არ შეინიშნება.
ირანის წარმომადგენელმა განაცხადა, რომ შაბათს ისრაელის საჰაერო დარტყმების სამიზნე ისპაჰანის ბირთვული კვლევითი კომპლექსი გახდა - ირანის უდიდესი ბირთვული ობიექტი. მისი თქმით თავდასხმის შედეგად საშიში მასალების გაჟონვა არ მომხდარა, თუმცა მაცხოვრებლებს ურჩიეს, თავი აერიდებინათ ამ ტერიტორიისთვის, რათა მაშველებს თავიანთი სამუშაო შეესრულებინათ.
სახელმწიფო მედიის ცნობით, ასევე ორი ადამიანი დაიღუპა და ოთხი დაშავდა ცენტრალური ირანის წმინდა ქალაქ ყუმში საცხოვრებელ შენობაზე პირდაპირი დარტყმის შედეგად. ეს ამბავი მალევე გავრცელდა მას შემდეგ, რაც ისრაელის თავდაცვის ძალებმა განაცხადეს, რომ ირანზე თავდასხმების ახალი ტალღა დაიწყეს.
ისრაელის ეროვნული საგანგებო სიტუაციების სამსახურები გამოიძახეს ქალაქ ხოლონში, სადაც ირანის სარაკეტო თავდასხმის შემდეგ შენობას ცეცხლი გაუჩნდა. დაშავებულების შესახებ ინფორმაცია არ არსებობს.
ირანელმა ოფიციალურმა პირმა CNN-ს განუცხადა, რომ აშშ-ს შეუძლია „ომის შეჩერება“ ერთი სატელეფონო ზარით, თუ აშშ-ის პრეზიდენტი დონალდ ტრამპი ისრაელის ხელმძღვანელობას ირანზე თავდასხმების შეწყვეტას მოსთხოვს. თუმცა, ტრამპმა ნიუ ჯერსიში ჟურნალისტებს განუცხადა: „ძალიან რთულია ახლა ასეთი რამ მოთხოვო, როდესაც ვიღაც იმარჯვებს“.
პარასკევს ჟენევაში ევროკავშირის მაღალი თანამდებობის პირის და ბრიტანეთის, საფრანგეთისა და გერმანიის საგარეო საქმეთა მინისტრების ირანელ კოლეგასთან შეხვედრის შემდეგ პროგრესის ნიშნები არ შეინიშნებოდა. ირანის საგარეო საქმეთა მინისტრმა განაცხადა, რომ ის აშშ-სთან მოლაპარაკებებს აღარ განაახლებს, სანამ ისრაელის თავდასხმის ქვეშ იმყოფება.